Монгол Улсын 34 дэх Ерөнхий сайдыг шинээр томилохтой зэрэгцэн Нийслэлийн Засаг дарга Х.Нямбаатарыг болж магадгүй гэсэн таамгууд нийгмийн сүлжээнд хөврөх болсон. Мөн түүнийг Жэнкогийн бүлэглэлтэй хүч хавсрах байх гэсэн таамгууд хөвөрсөн. 

Түүний хувьд нийслэлийн иргэдийнхээ итгэлийг дааж, багаараа Нийслэлийн Иргэдийн төлөөлөгчдийн хуралд сонгогдсон. Энэ ч утгаараа нийслэлд эхлүүлсэн ажлаа амжилттай дуусгах, үр дүнг нь үзэхийн төлөө бүх чадлаараа хичээж ажиллана гэдэг байр сууриа албан ёсоор илэрхийллээ. 

Х.Нямбаатарын хувьд 2024 оны орон нутгийн сонгуульд "Жэнко" бүлэглэлийн гар, хөлийг шууд зоригтойгоор "нухчин" дарсан онцлогтой. Гэмт хэрэгт холбогдож байсан, ял эдэлж байгаа, гудамжнаас төлбөртэй лайв хийдэг зэрэг олон ёс зүйгүй нэр дэвшигч нарыг эзэнтэй нь юутай нь "ханд"-ыг нь хага дарж чадсан гэхэд хилсдэхгүй. Үүний үр дүнд МАН нийслэлд олонх болж чадсан билээ. Түүний хувьд "хулгайч" нартай хамтарч ажиллахгүй, туйлбаргүй хүмүүст ажил өгөхгүй гэдэг үзэл бодлоо нийслэлийн шуурхай дээр удаа дараа сануулаад байгаа аж. 

Өнөөдөр хотын дарга Х.Нямбаатар хэвлэлд өгсөн тодруулгандаа шинээр томилогдох Ерөнхий сайд дээр намынхаа шийдвэрийг хүндэтгэж дагана, хотын баг эхлүүлсэн ажлаа үргэлжлүүлж хэлсэн амандаа хүрнэ хэмээн мэдэгдлээ. 

Хэлэх гэснээ шулуухан хэлдэг, байгаа нөхцөл байдлыг зөөллөж тойруулахаасаа илүүтэй бодит байдлыг нь түс тас илэрхийлдэг Х.Нямбаатарыг элдэв цуурхал, шүүмжлэл байнга дагадаг ч түүний эхлүүлсэн ажлыг нийслэлчүүд хүлээн зөвшөөрч, үр дүнг нь хүлээж буй.