Монгол Улсын 34 дэх Ерөнхий сайдад нэр дэвшигчийг энэ долоо хоногт буюу баасан гарагт УИХ-ын чуулганаар оруулах талаар албан бус мэдээлэл бий. 

Чуулганаас өмнө пүрэв гарагт МАН-ын бага хурлыг хуралдуулж, шинэ Ерөнхий сайдыг дэмжих эсэхийг хэлэлцэх албан бус тов гарчээ. Гэхдээ маргааш энэ тов тодорхой болно. 

Өнөөдрийн байдлаар дараагийн ерөнхий сайдад МАН-аас хэд хэдэн хүний нэр хөврөвч, хөшигний ард хоёр нэр дээр сонголт хийх асуудал тулгараад буй гэх. Үүнд ЕТГ-ын дарга Г.Занданшатар, Сангийн сайд Б.Жавхлан нар юм. 

Харин ЗГХЭГ-ын дарга Н.Учрал өнгөрсөн хугацаанд Ерөнхий сайд болох нэр дэвшигчдийн тоонд зүй ёсоор багтсан ч өнгөрсөн сард өөрөө болохгүй гэдгээ намдаа мэдэгдсэн байна. Түүний хувьд ЗГХЭГ-ын даргаар үргэлжлүүлж ажиллах хүсэлтэй байгаа аж. 

УИХ-ын гишүүдээс дэмжлэг буюу кноп авч чадах зангарга, нөлөөтэй улс төрчийг Засгийн тэргүүнээр тавих эн тэргүүний зорилготой. Сангийн сайдын албыг хоёр засаг дараалан хашсан Б.Жавхлангийн хувьд шүүмжлэл их дагуулдаг ч УИХ-ын гишүүдтэй тохирч, засгийн ажлаа явуулах дэмжлэг авч чадах улс төрч хэмээн харж буй. 

Нөгөөтэйгүүр ЕТГ-ын дарга Г.Занданшатарт  МАН-ыг ч, засгийг ч толгойлох хүндтэй үүргийг үүрүүлэх яриа эртнээс явсан. Түүний хувьд УИХ-ын даргаар хоёр удаа ажилласан туршлагатай улс төрч мөн үү гэвэл мөн. Гэхдээ МАН-ын бага хурал, гишүүдийн дэмжлэгийг авах нь эхний шалгуур. Үүнийг харгалзан дээрх хоёр улс төрчөөс өөр сонголтгүй болжээ. 

УИХ-ын дарга Д.Амарбаясгалангийн хувьд тэнцвэртэй байдлыг хангах, өөрийн карьерыг бодох үүднээс одоогийн спикерын албандаа сэтгэл хангалуун нэгэн. Түүнийг өнөөгийн улс төрийн хүчийг тэнцвэржүүлэх, залуу үеийг төлөөлөх чухал субьект болж хувирсан хэмээн намын гишүүд нь ч үнэлдэг. Түүнд 126 гишүүнийг зангидах, парламентын засаглалыг бэхжүүлэх хүндтэй үүрэг буй тул энэ удаа хойш суусан гэх албан бус мэдээлэл бий. 

Өдгөө улс орны удирдах албан тушаалд улс төрийн манлайлалтай, туршлагатай, сэтгэл хөдлөлөөр бус шийдвэр гаргах түвшинд нөлөөлж чадах улс төрчид бодсоноос илүү "цөөн" байгааг эдгээр өдрүүд харуулаад буй.