"Ногоон автобус"-ны гэх А.Ганхуяг нарын 24 хүнд холбогдох хэргийн шүүх хуралдаан энэ оны хоёрдугаар сарын 24-нөөс эхэлж, өнөөдрийг хүртэл Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд үргэлжилж байгаа билээ.

Тус хэрэгт  яллагдагчаар татагдсан Түгжрэлийн сайд асан Ж.Сүхбаатар "Намайг буруутгаж буй нэг зүйл нь хотын дарга асан Д.Сумьяабазарын гэрчийн мэдүүлэг. Энд ердөө "Ж.Сүхбаатар сайд нийтийн тээврийн асуудлыг бүхэлд нь хариуцаж байсан" гэж ярьсныг ярьж байна.

Би энэ автобустай холбогдсон байдал бол төсвийн ерөнхийлөн захирагчийн хувьд үйлчилгээнд хэзээ гаргах вэ гэдгийг нэхэж байгаа. Прокурор өчигдөр надад "та хашир хүн, хүлээн авахад нь оролцож болоогүй юм уу" гэж хэлсэн. Би А.Ганхуягтай гуравдугаар сарын 7-нд уулзахдаа "Хятад автобусанд чинь хулхи зүйл орж ирэх вий дээ, чанарт онцгой анхаараарай" гэсэн. Хүлээн авахад ингэж анхаарч байсан.

Д.Сумьяабазар бид хоёр Монголын түүхэнд анх удаа хүлээж аваагүй байгаа 100 автобусыг Сүхбаатарын талбай дээр ил гаргаж тавьсан."Daewoo"-г брэнд л гэж ойлгож, Солонгосын чанарт эргэлзээгүй.

Яагаад гэвэл бид хоёрын хооронд болсон яриа ердөө тэр. Янз бүрийн яриа гараад байна.

Д.Сумьяабазар бид хоёр есдүгээр сарын 28-н хүртэл автобус доголдолтой гэдгийг мэдээгүй болох нь Сүхбаатарын талбайд гаргаж тавьсан 100 автобуснаас харагдана." гэв.