2025 оны улсын төсөв хэлэлцэж буй үед ЗГХЭГ-ын харьяа Удирдлагын академи хэрхэн тансаглаж, удирдлагууд нь татвар төлөгчдийн мөнгөөр хэрхэн тоглож байгаа талаар би өмнө мэдээлсэн. Удирдлагын академийн багш, ажилчид ЗГХЭГ-ын дарга Н.Учралд энэ оны 9 дүгээр сард албан тоот хүргүүлж, бүх асуудлыг баримт нотолгоотой хүргүүлсэн байдаг.

Гэвч ЗГХЭГ-аас хариуцлага тооцох нь битгий хэл Удирдлагын академийн захирал Д.Сүрэнчимэгт давуу байдал олгож, нэг тэрбумын төсөвтэй байсан байгууллагыг төсвийг 6 тэрбум болгон өгсөж 2025 онд төсөвт суулгасан байв. Сарын 30 сая төгрөгийн цалинг өөртөө олгосон Д.Сүрэнчимэгийн ёс бус үйлдлийг хүргэж байна. 

Гэтэл Удирдлагын академийн захирал Д.Сүрэнчимэг нь дэд профессорын шалгуурыг хангаагүй боловч, академийнхаа эрдмийн зөвлөлийн дахин шинээр байгуулан өөртөө дэд профессор цол олгуулсан байгаа юм. 

Тодруулбал, 2023 оны 9 дүгээр сарын 25-ны өдрийн Эрдмийн зөвлөлийн хурлаар Д.Сүрэнчимэг нь дэд профессорын шалгуурыг хангаагүй боловч хуралдаанд орж, санал хураалтаар 73.3 хувийн санал авч тэнцээгүй аж. Гэсэн хэдий ч Эрдмийн зөвлөлийн хурал болсноос хойш сар гаруйн дараа буюу 2023 оны 11 дүгээр сарын 13-ны өдөр эрдмийн зөвлөлийн бүрэлдэхүүнийг татан буулгаж шинээр эрдмийн зөвлөлийг дахин байгуулж, хоёр хоногийн дараа өөртөө дэд профессор цол олгуулах ажлыг зохион байгуулжээ. 

Эрдмийн зөвлөлийн ажиллах журмын дагуу зөвлөлийн гишүүдэд 3 хоногийн өмнө хэлэлцэх асуудлын дэгийг илгээхэд дэд профессор цол олгох санал хураалтын тухай асуудал байгаагүй аж. Удирдлагын академийн хувьд хэрвээ дэд профессор, профессор цолыг эрдмийн зөвлөлийн хурлаар ороод авч чадаагүй бол нэг жилийн дараа дахин ордог. ШУТИС-ийн хувьд 2 жилийн дараа дахин орох эрх нь нээгддэг байна. 

Дээрх үйл явдал нь Монголын их дээд сургуулиудын түүхэнд гарч байгаагүй хэмээн эрдмийн зөвлөлийн гишүүд нь толгой сэгсэрч байжээ.  Энэ мэт увайгүй, төсвийн мөнгөнд шунасан хууль бус, ёс зүйгүй үйлдэлд яагаад хариуцлага тооцохгүй байна вэ. Д.Сүрэнчимэгийн ард ЗГХЭГ-ын дарга Н.Учрал байгаа юу хэмээн хардахад хүргэж байна. Хариуцлага тооцохгүй, улам хөхүүлэн дэмжиж байгаа нь ашиг сонирхлын зөрчлийг харуулж буй хэрэг.