ӨнөөдөрМонголбанкны улстөрчидтэй холбогдсон “БУЛХАЙ“
Монгол Улсын нийгэм, эдийн засгийн бодлогыг бид олон шүүмжилсээр ирсэн.Иргэдийнх нь аж амьдрал доройтоод байхад мөнгөний бодлого зохицуулдаг Монголбанктай холбогдсон хүмүүс нь өнгө орж, дээшээ залардаг тогтолцоо манайд нэгэнт тогтжээ.
Манай мэдээллийн редакц өмнө нь “Монголбанкны улстөрчидтэй холбогдсон “БУЛХАЙ“ мэдээллээрээ улс төрчдийн эхнэр, хүүхдүүд Монголбанкинд хэрхэн шургалсан цуврал нийтлэлээ хүргэсэн. Энэ удаа бид улс төрчдийн ургийн мод Монголбанкинд хэрхэн үргэлжилж буй талаар хүргэе.
УИХ-ын гишүүн асан Ч.Хүрэлбаатарын эхнэр н.Саранцэцэг Монголбанкны мөнгөн тэмдэгтийн газрын дарга
Эдийн засаг хөгжлийн сайдаар ажиллаж байсан Ч.Хүрэлбаатарын эхнэр н.Саранцэцэг Монголбанкны мөнгөн тэмдэгтийн газрын даргаар ажилладаг. Маш чухал албан тушаал дээр Ч.Хүрэлбаатар эхнэрээ ажлуулахад улс төрийн чамгүй нөлөө орсон гэдгийг тус банкны ажилтнууд хэлдэг. Энэ ч утгаараа Монголбанкны Ерөнхийлөгч Б.Лхагвасүрэн, Ч.Хүрэлбаатар хоёр их ойр харьцаатай байсан гэдэг. АТГ-аас Монголбанкны Ерөнхийлөгчөөр ажиллаж байсан Н.Баярсайханыг баривчилж, шалгалтын ажиллагаа явуулсан дуулианы дараа мөнгөн тэмдэгтийн газрын дарга Н.Саранцэцэг тэтгэвэртээ яаравчилж, гарахаар бичиг баримтаа хөөцөлдөж, 36 сарын тэтгэмжээ авах хүсэлтээ өгөөд байгаа сурагтай. Ч.Хүрэлбаатарын эхнэр н.Саранцэцэгээс бүгд айдаг гэх. Түүнтэй хэл ам хийвэл нөхөр нь хариуг нь барьдаг гэх “айдас” төв банкинд нүүрлэсэн гэлтэй.
Гадаад харилцааны дэд сайдаар ажиллаж байсан Г.Тэнгэрийн эхнэр А.Шижирмаа Монголбанкны дотоод аудитын газрын дарга
МАН-ын гишүүн Г.Тэнгэр нь намынхаа гадаад харилцааны албаны дарга, Гадаад харилцааны дэд сайдын суудалд хүртэл тухлаж үзсэн нэгэн юм. Тэгвэл өөрийн эрх мэдэлтэй байх үеэдээ эхнэр А.Шижирмааг Монголбанкинд шургуулаад амжжээ. А.Шижирмаа нь төв банкны дотоод аудитын газрын даргын албыг одоо хашиж байгаа. Мөн Капитал банкны эрх хүлээн авагчийн зөвлөлийн дэд даргаар хүртэл ажиллаж, маш өндөр дүнгээр өөрсдийгөө шагнуулсан хэсэг бүлэг хүмүүсийн тоонд багтдаг. Манай мэдээллийн сайт тухайн үед Капитал банкны эрх хүлээн авагчид 200 саяар шагнуулсан талаар мэдээллийг хүргэж байсан билээ. А.Шижирмаагийн хувьд хамт олон дундаа байнга хэл ам таталдаг нэгэн. Түүнийг мэргэжлийн бус хүн, бүжигчин байсан гэх шүүмжлэлүүд байдаг. Монголбанкныхаа найр, наадам, шоу цэнгээнийг Шижирмаа алгасна гэж байхгүй хэмээн дотоод аудитын газрыхан нь хэлж байв. Монголбанкинд мэргэжилтнээр шургалж ороод дарга болдог жишиг А.Шижирмаад үйлчлэв. Ер нь дампуурсан банкинд эрх хүлээн авагчаар томилогдоно гэдэг бол хэр баргийн хүнд олдохгүй том боломж аж. Энэ нь лоббигоор томилогддог гэдгийг бүгд мэддэг. Бичигдээгүй хууль гэлтэй. Хамгийн багадаа 5 саяас дээш цалин авна, байраар шагнуулна, их хэмжээний мөнгөн урамшуулал хүртэл авна гээд талийж өгнө.
Үүгээр тогтохгүй. Монголбанкны мэргэжилтэн, дарга цэрэггүй бүгд хэн нэгний эхнэр, бэр, хүүхэд, дотно харьцаатай нэгэн нь байдаг. Үүнийгээ ч дотооддоо бүгд мэддэг.
УИХ-ын гишүүн асан Ш.Бадамын охин Б.Алимаа нь Монголбанкны хэлтсийн захирал
УИХ-ын гишүүнээр ажиллаж байсан, МАХН-ын хуучны кадр Ш.Бадамын охин Б.Алимаа нь мөн л Монголбанкинд дарга хийдэг. Өөрөөр хэлбэл Ч.Хүрэлбаатарын эхнэр Н.Саранцэцэгийн газарт ажилладаг гэсэн үг. Б.Алимааг Боловсролын Зээлийн сангаар сурсан гэж хамт олон нь ярьдаг. Саяхан бусдын боломжийг хулгайлан сурсан хүмүүсийн эгнээд байсан гэх яриа бий. Б.Алимаа ажил мэргэжилдээ тааруу, чадвар муутай хэмээн байнга шүүмжлүүлсэн ч ажилдаа тогтоод байдаг нь түүний улс төр дөх аавынх нь нөлөө хэмээн төв банкныхан ярьдаг. Хамт олон нь Б.Алимааг шүүмжилж, ажлаа хийж чадахгүй байна гэх саналаа удирдлагууддаа хэлж байсан боловч төд удалгүй нам дарагдаад өнгөрдөг гэх.
Төв банкны Ерөнхийлөгч Б.Лхагвасүрэн өөрийн хүү Л.Тэмүүжинг Хөгжлийн банкинд байршуулаад авсан зальжин эр. Бүр болоогүй 2020 оноос Хөгжлийн банкны Хөрөнгийн удирдлагын газрын даргаар ажиллаж байгаа. Ашиг сонирхлын зөрчилтэй аав, хүү хоёр гэж олон нийтээр маш их шүүмжлүүлсэн ч гүрийгээд өнгөрсөн гэр бүл. Банк ашигтай гэдгийг мэдэрсэн гэр бүлд ёс зүй хамаатай юу. Л.Тэмүүжин хөгжлийн банкны өмнө удирдлагууд 500 тэрбумын бонд гаргахад оролцож байсан гэдгээр нээлттэй сонсголд дуудагдаж байсан.
Тухлахад таатай, дулаан орчинтой, найр цэнгээний хөл тасрахгүй, тансаг ресторан, тал бүрийн ашигтай ажлын байр бол Монголбанк гэх яриа улс төрд бий. Энэ л орчинд нөлөө тогтоож, мөнгөний бодлого, валютын зөрүүнээс ашиг хүртээд суудаг томоохон дарга нарыг толгой дээрээ залсан улс ингэж хөгжихгүй гээд яах билээ. Монголбанкны Ерөнхийлөгч хамгийн урт настай, удаан жаргалтай, хамгаалалт өндөр байдаг нууц нь “улс төрчдийн ар гэр, эхнэр хүүхэд, ойрын хүүхнүүдийг нь ажлын байраар хангадаг” учраас л тэр байж.
Бас болоогүй тэднийг 5,10 жилээс дээш ажилласан тоонд орвол байр, орон сууцны дэмжлэг үзүүлчихнэ. Сардаа 5-8 сая төгрөгийн цалин хангамжийг өгчихнө. Ипотекийн зээлэнд тэргүүн эгнээнд очер дараалалгүй хамруулчихна гээд тал бүрийн тэтгэмж, халамжаар торддог “буянтай” газар болж хувирчээ.
