Монгол Улсын Ерөнхий сайд асан Сү.Батболд Нью-Йоркт хууль бусаар олсон мөнгөөрөө үл хөдлөх хөрөнгө худалдан авч, мөнгө угаасан хэргийг АНУ-ын прокурорын газраас шалгаж байгаа талаар www.justice.gov сайт мэдээллээ. 

Түүнийг гэр бүлийн зарим гишүүдийн хамт Нью-Йорк хотод байрлах 14 сая долларын өртөг бүхий тансаг зэрэглэлийн хоёр орон сууцыг худалдан авахдаа хууль зөрчсөн гэж үзэж, тус орон сууцыг хураахыг хүссэн иргэний гомдлыг АНУ-ын шүүх өчигдөр бүлээн авчээ.

“Төрийн авлигаас хувьдаа ашиг хонжоо олсон Батболдын үйлдэл нь түүний удирдаж байсан хуулийг дээдлэгч ард иргэдийг хохироож байна” гэж Холбооны Мөрдөх Товчооны захирлын туслах Жэймс Смит дүгнэсэн байна.

Батболдын төлөөний хүний нэр дээр бүртгэлтэй, уул уурхайн үйл ажиллагаа эрхэлж байсан ямар ч түүхгүй Catrison нэртэй компани томоохон гэрээ байгуулсны шагналд $68 саяыг авсныг шалгалтын явцад тогтоожээ.

Уг компанийн цорын ганц захирал нь хэл шинжлэлийн багш хүн байсныг бас тогтоосон байна.

Энэ мөнгөний тодорхой хэсгээр Манхэттэн дүүрэгт хоёр орон сууц худалдаж авсныг АНУ-ын эрх баригчид тогтоожээ.

Орон сууцнуудын нэгд Батболдын ууган хүү амьдарч, шуудангийн хаягийг нь ашиглаж байсныг прокуроруудын шүүхэд гаргасан нэхэмжлэлд дурдсан байна.

Одоогоор С.Батболдод ямар нэг ял төлөвлөөгүй ч хэрвээ шүүх прокурорын нэхэмжлэлийг үндэслэлтэй гэж үзвэл дээрх үл хөдлөх хөрөнгүүдийг улсын мэдэлд хурааж авах юм.