Өнгөрсөн долоо хоногоос эхлэн нийгмийн сүлжээнд нийтийн тээврийн парк шинэчлэлтийн хүрээнд “Daewoo” компаниас нийлүүлэгдэж байгаа автобуснуудтай холбоотой олон асуудал нийгэмд эргэлзээ төрүүлээд байгаа юм. Энэ хүрээнд АТГ, ЭЦА-наас автобус нийлүүлэх тендэрт "Хулхи ногоон"-ы эзэн "Тэнүүн-Огоо"-г шалгаруулсан албан тушаалтануудыг шалгаж эхлээд буй.

Тухайлбал, урд шөнө "Тэнүүн-Огоо" ХХК-ийн захирлууд, НХААГ-ын хоёр ажилтныг саатуулаад байна. 

Мөн  Мөн Нийслэлийн ЗДТГ-ын дарга И.Баатархүү, Худалдан авах ажиллагааны газрын дарга Г.Энхтайван нарыг ЭЦА-ныхан байцаалт авчээ.

• Т.Энхтайваны нь Ж.Сүхбаатар Нийслэл Улаанбаатар хотын түгжрэлийг бууруулах Үндэсний хорооны даргаар томилогдохоосоо өмнө зөвлөхөөрөө ажиллаж байсан аж.

Тэгвэл бид “Тэнүүн Огоо” ХХК-ийн удирдлага болон хувьцаа эзэмшигчдийн талаар мэдээллийг хүргэж байна.

“Тэнүүн-Огоо” ХХК-ийг 2009 оноос хойш Дэлэгдоржийн Амгаланбаатар, Ачитсайханы Батттүшиг, Бандийн Гонгор, Аюушийн Ганхуяг гэх дөрвөн хүн эзэмшиж буй. 

Харин “Тэнүүн-Огоо” ХХК-ийн хувьцаа эзэмшигчид болох Д.Амгаланбаатар, А.Баттүшиг, Б.Гонгор нар нь УИХ-ын дарга асан З.Энхболд болон Зам, тээврийн сайд асан А.Гансүх хоёрын "баруун гар"-ууд ажээ. 

Бүр ноцтой нь Зам, тээврийн сайд асан А.Гансүх нь Түгжрэлийн сайд Ж.Сүхбаатар хоёр их сургуулийн нэг ангийн найзууд байна.

Харин тус "Тэнүүн-Огоо" ХХК-ийн хувьцаа эзэмшигч Д.Амгаланбаатар нь Зам, тээврийн сайд асан А.Гансүх зөвлөхөөр ажиллаж байсан аж. Тодруулбал, Д.Амгаланбаатар нь   2008-2012 онд А.Гансүх Зам тээврийн дэд сайд байх үед, 2012-2014 онд Зам тээврийн сайд тус тус зөвлөхөөр нь ажиллаж байжээ.

Өөрөөр хэлбэл, Д.Амгаланбаатар А.Гансүхийн Зөвлөх байхдаа буюу 2009 онд “Тэнүүн-Огоо” ХХК-ийн хувьцаа эзэмшигч болжээ.

Гэтэл Д.Амгаланбаатар одоо хүртэл А.Гансүхэд хүчин зүтгэдэг нэгэн бөгөөд түүний  төрсөн дүү А.Ганболдын эзэмшдэг компаниуд Гүйцэтгэх захирлаар ажилладаг байна.

"Тэнүүн-Огоо" ХХК-ийн хувьцаа эзэмшигч А.Баттүшиг  нь УИХ-ын дарга асан З.Энхболдын төрсөн дүү З.Хишигтогтохтой хамтран "Инфра инженеринг" ХХК-ийг эзэмшдэг байна. Түүнчлэн "СТРАТО" ХХК-ийг хамтран эзэмшдэг юм байна. Тус компани нь З.Энхболдын Интер ХХК-ийн байранд байдаг аж.

Түүнчлэн "Тэнүүн-Огоо" ХХК-ийн хувьцаа эзэмшигч Б.Гонгор нь А.Баттүшигийн найз. АНУ-д амьдарч байгаад ирмэгц нь "Тэнүүн-Огоо" ХХК-ийн хувьцаа эзэмшигч болгожээ. 

Товчхондоо, “Ногоон автобус”-ны “но” буюу “Тэнүүн-Огоо” ХХК-ийн “нууц эзэд” нь тодорхой болж байх шиг...