Олон нийтийн засаглах эрхийн цахим талбар болох вэб, аппликейшн хосолсон D-Parliament платформыг их, дээд сургуулийн оюутнууд, багш судлаачдад танилцуулж, мэдээлэл солилцох ээлжит уулзалт энэ удаа АШУҮИС дээр боллоо.

Уулзалтын үеэр УИХ-ын дарга Г.Занданшатар D-Parliament аппликейшний үндсэн функцуудыг танилцуулж, Засгийн Газраас өргөн мэдүүлсэн Дээд боловсролын тухай хуулийн төслийн зарим зүйл, заалтуудын хүрээнд багш, оюутнуудтай нээлттэй ярилцав.

АШУҮИС нь дэргэдээ 4 эмнэлгийг байгуулж, их сургуулийн эмнэлгийн тогтолцоог бүрдүүлэхээр зорьж байгаагийн хувьд Дээд боловсролын тухай хуулийн төсөлд хамт олноороо, нэгдсэн саналаа идэвхтэй илэрхийлж байсан юм. Харин оюутнуудын төлөөллийн хувьд D-Parliament аппликейшнийг хэрэглэхэд хялбар төдийгүй хэн нэгэн хуурамч хаягнаас хандах боломжгүйгээрээ давуу талтай байгааг онцоллоо.

Хууль тогтоох үйл хэрэгт иргэдийн оролцоог хангахаас гадна парламентын ил тод байдал, эргэх холбоог сайжруулж, зөвлөлдөх ардчиллыг төлөвшүүлэхийн тулд уг цахим системийн хэрэглээг нэмэгдүүлэх нь чухал ач холбогдолтой юм.