Өнөөдөр Эдийн засгийн байнгын хорооны хуралдаанаар "Эрүүл мэндээ хамгаалж, эдийн засгаа сэргээх 10 их наядын цогц төлөвлөгөөний хэрэгжилтийн талаарх мэдээллийг сонссон. Гэтэл хуралдааны үеэр яам, агентлаг, газруудын өгсөн мэдээлэл олны анхаарлыг татав. 

Тухайлбал, УИХ-ын гишүүн Б.Энхбаяр "Цар тахлын хөл хорионы үед 1059 тоглолт, контент бэлтгэсэн байна. Төсвөөс мөнгө гаргаагүй гээд байсан. Гэтэл улсын төсвөөс хийсэн юм уу. Хэдэн төгрөгөөр хийсэн бэ.  "Шинэ үеийн нэгдмэл залуус" гэх ганц төрийн бус байгууллага руу НЗДТГ-аас гэхэд "Наадам зохион байгуулах" гэх утгаар 4.5 тэрбум төгрөг шилжүүлсэн байна. Гэвч наадам болоогүй биз дээ. Тэр мөнгө хаачсан юм бүү мэд… Нэгхэн төрийн бус байгууллага руу ийм их мөнгө шилжүүлж байгаа юм чинь өөр хаашаа, хэрхэн мөнгө шилжүүлж, угаасныг хэн ч таашгүй" гэж хэлсэн үг нь олны анхаарлыг татаад байна. 

Өөрөөр хэлбэл цар тахлын үед төсөв мөнгөө хэмнэх ёстой төр контент нэрээр хэдэн тэрбумаар нь цацсанд иргэд шүүмжлэлтэй хандаж байгаа юм. 

Тэгвэл өнөөдрийн байнгын хорооны хуралдаанаар нэр нь гарсан "Шинэ үеийн нэгдмэл залуус" төрийн бус байгууллага нь 2016 онд П.Дэнсмаа гэх хүний нэр дээр  байсан бол 2019 онд З.Нямзул гэх хүний нэрээр Улсын бүртгэлийн ерөнхий газарт бүртгэлтэй болжээ. (холбогдох мэдээллийг open.data)

Харин 2019 оноос эхлээд урлаг соёлын арга хэмжээ,шоу зохион байгуулах нэрээр Улсын баяр наадмын комиссоос гурван тэрбум 132 сая төгрөг авсан бол БОАЖЯ-наас 837 сая төгрөг авсан байна.