УИХ-ын гишүүн асан Д.Гантулгын бүрэн эрхийг сэргээхийг эсэргүүцсэн "Бандааштай жагсаал" өнөөдөр Үндсэн хуулийн цэцийн гадна талбайд боллоо.
Уг жагсаалыг Ардчилсан намын эмэгтэйчүүдийн холбоо болон МАХН-ынхан Үндсэн хуулийн цэцийг шударга бус ажиллах гэж байна хэмээн үзэж  зохион байгуулж байгаа аж. 

Жагсаалд оролцсон төлөөллүүд “Иргэд сонгох эрхээ эдэлж чадахгүй байна. УИХ-ын гишүүн Д.Гантулгыг дахин гишүүн болгож болохгүй. Сүүлийн үед хүүхэд эмэгтэйчүүдийг хүчирхийлсэн хэрэг их гарч байгаа нь нийгмийг эмзэглүүлж байгаа. Үндсэн хуулийн цэц шударга ажиллах хэрэгтэй. Д.Гантулгын хэрэг дээр маргаан үүсгэх шаардлагагүй” гэв.

Өнөөдөр Үндсэн хуулийн цэцийн дунд суудлын хуралдаан болж байгаа. Энэ хуралдаанаар Д.Гантулгыг УИХ-ын гишүүнээс чөлөөлсөн УИХ-ын 49 дүгээр тогтоол болон Хэнтийн 42 дугаар тойргийн нөхөн сонгууль товлон зарлах, санал авах өдрийг тогтоох тухай” 22 дугаар тогтоол, Сонгуулийн тухай хуулийн 12 дугаар зүйлийн 12.1, 12.3 дахь хэсэг Үндсэн хуулийн зарим заалтыг зөрчсөн эсэхийг хэлэлцэж, шийдвэрлэх юм.