Өнөөдөр Худалдаа Хөгжлийн банкны гүйцэтгэх захирал О.Орхон болон холбогдох албаныхан шуурхай хэвлэлийн бага хурал хийлээ.

ХХБ-ны Гүйцэтгэх захирал О.Орхон

 “Өнгөрсөн өдрүүдэд болсон сэтгэл сэртхийм аймшигтай үйл явдлын талаар мэдээлэл өгөх нь зөв байх гэж бодож байна. Энэ бол улс төрийн зорилготой, албан тушаал, эд хөрөнгийн дахин хуваарилалтын дор болсон явдал.

Өмнө нь Эрдэнэтийн 49 хувийн асуудалтай холбоотойгоор өнгөрсөн онд нэг удаа дуудаж мэдүүлэг авсан. Өчигдөр гэрээсээ ажил руугаа явж байхад хууль бус баривчилгаа болсон. Ингэхийн тулд хуулийн дагуу боломж байсан ч нэгийг нь ч ашиглалгүйгээр цагдаагийн тусгай хүчнийг ашиглаж онц ноцтой гэмт хэрэгтэн баривчилж байгаа мэтээр баривчилсан. Ингэхдээ миний асуултад огт хариулалгүй авч явсан.

Урд өдөр нь Л.Оюун-Эрдэнэ сайд Ц.Пүрэвтүвшин, О.Орхон мэтийг залуусыг шоронд хоригдох болсонд харамсаж байна гэсэн.

Цагдаагийн байгууллага зөвхөн гэрчийн мэдүүлэг авсан.

Монголын нийгэмд болж байгаа бүх зүйлийн цаана нэг банк, нэг хүн байгаа мэтээр зохион байгуулалттайгаар мэдээлэл цацаж байгаа. Гомдол гаргаснаар өчигдөр суллагдсан.

Энэ нь урдаас төлөвлөсөн зүйл гэдэг нь Засгийн газрын хэрэг эрхлэх газрын дарга Л.Оюун-Эрдэнийн хийсэн мэдэгдэлтэй холбоотой. Түүний хийсэн мэдэгдэлд нэр дурдагдсан хүмүүсийг  маргааш өглөө нь баривчилсан. Шүүхээс өчигдөр дээрх баривчилгааг хууль бус ажиллагааг байсныг тогтоосон. Л.Оюун-Эрдэнийн мэдэгдэлд нийтэд ил болгосон  хурлын тэмдэглэл  болон санхүүгийн схем  зэрэг нь саяхан ил болсон зүйл биш 2016 онд нууцаас гарсан материал.  Нэг зүйл онцолж хэлэхэд дээрх  схемд  хууль шүү ийн байгууллагаар эцэслэн тогтоогдоогүй, алдаатай худал зүйл олон бий. Хэт нэг талыг барьсан алдаатай мэдээлэл гэдгийг хэлмээр байна. Мөн схемээр ХХБ-ийг  их хэмжээний  санхүүжилт олгосон гэж буруутгаж байна. Гэхдээ ХХБ хэдэн мянган хүн, албан байгууллагад маш олон төсөл хөтөлбөрийг санхүүжүүлж ирсэн. Энэ нь  манай үндсэн бизнес. Анх ХХБ үүсгэн байгуулагдсан цагаасаа дагаж мөрдсөөр ирсэн. ХХБ санхүүжилт хуулийн хүрээнд хийгдсэн хууль зөрчөөгүй зүйл байхгүй. Мэдээж  маш том гэрээ хэлцэл байсан. Мөн давуу байдлыг бий болгосон гэсэн гэхдээ тийм зүйл болоогүй. Хувийн банк өөрийн дүрэм журмын дагуу хувийн байгууллагад зээл олгосон. Хууль, дүрэм журам зөрчөөгүй гэдгийг хариуцлагатайгаар мэдэгдмээр байна

Л.Оюун-Эрдэнэ сайдын ил болгосон зүйл бол саяхан ил болсон зүйл биш. Тэр схем бол Эрдэнэтийн 49 хувийг худалдан авах ажиллагааг шалгах ажлын хэсгийн гаргасан схем. Схемд хууль, шүүхийн байгууллагаар нотлогдоогүй, худал зүйл олон бий.

Энэ дээр харилцагчийн нууцтай холбоотой олон нууц байгаа. Схемд ашигласан материалууд бол хууль шүүхийн байгууллагуудын олж авсан зүйл.

Харилцагч нартаа хандаж хэлэхэд өнгөрсөн өдрүүдэд хүлээцтэй хандаж, дэмжлэг туслалцаа үзүүлсэнд талархал илэрхийлмээр байна. Банкны өдөр тутмын үйл ажиллагаа хэвийн, сайн явагдаж байгаа. 

Өнөөдөр банкныхаа тайлантай танилцсан. Манай татан төвлөрүүлсэн хөрөнгө нэмэгдсэн үзүүлэлттэй байна. 

Хүний эрх, компанийн эрх зөрчилдсөн хууль бус ажиллагаа явагдсанд харамсаж байна" гэлээ. 

ХХБ-ны ТУЗ-ийн Гүйцэтгэх дэд дарга Р.Коппа “Эрдэнэтийн худалдан авалтын механизын талаар мэдээлэл хүргэе. Олон улсад үүнийг зээлээр худалдан авах процесс гэдэг. 

Энэхүү санхүүжилтийн механизм нь АНУ-д түгээмэл ашиглагддаг. Эрдэнэт үйлдвэр 100 хувь Монголын өмч болж байгаа нь чухал. Би гадны хүн учраас улс төртэй холбоотой асуудлаар коммент өгмөөргүй байна. 

Гадны хөрөнгө оруулагчид Монголд болж байгаа үйл явдлын анхааралтай ажиглаж байгаа" гэв.  

ШУУД ҮЗЭХ : хэвлэлийн бага хурал