Улстөрчдийн зүгээс “пиар”-ын багийн санаатай, эсвэл санамсаргүйгээр алдсан элдэв төлөвлөгөө, “хар зураг” алдагдаж тараагдах нь цөөнгүй. Энэ удаад мөн л нэгэн төлөвлөгөө улс төр, хэвлэл мэдээллийнхний явцуу хүрээнд тараагдах болов. Байдаг л сэдэв голдуу байсан ч “Доржзодовын халдлага” гэдэг үг анхаарал татлаа.

Нээрэн, Г.Доржзодовт халдчихвал яах билээ. Түүний “нээлт” буюу “60 тэрбумын бичлэгийг шинжилж оргиналь гэдгийг тогтоосон дэлхийд нэртэй компани нь Нью-Йоркт подвал түрээсэгч байсан нь тогтоогдлоо” гэсэн мэдээлэл цацагдах болсон. Хэрэв ингэтлээ илчлэгдсэн бол сүүлчийн гэрч болох Г.Доржзодов эрсдэлд орж таарна. Энэ тохиолдолд хэн түүнийг “үгүй хийж”, юу хожиж болох вэ гэдгийг мартаж болохгүй. Түүний зөв, буруу аль нь боловч одоо түүнд хамгаалалт хэрэгтэй.

Өмнө нь 2017 оны зургадугаар сарын 15-нд дуулиантайгаар “баривчлагдаж”, экс сайд Ц.Оюунгэрэлийнд нуугдаж байсан түүнийг албаны эх сурвалжууд “хамгаалалтад авах үүрэг хүлээсэн” гэдэг ч гол дүр өөрөө баривчлагдсан гэдэг үгийг сонгох дуртай байж үлгэрээ үргэлжлүүлдэг. Магадгүй тэр үед ч гэсэн хамгаалалтад авах хэрэгтэй ч болсон юм билүү. Хэрэв ял төлөвлөгдсөн гэмтэн байгаад, эрх мэдэлтнүүд түүнийг захиалгаар ч атугай шийтгэхээр байсан бол өдийд ч тэр хоригдож л байх байсан. Түүний үзэл бодол, “өчиг мэдүүлэг” хэвээрээ ч нөхцөл байдал өөрчлөгдсөөр байна. Харин одоо болзошгүй нөхцөлд иргэнээ хамгаалах үүргийнхээ дагуу түүнийг хамгаалалтад авах нь зүйтэй. Эсвээс наанадаж “түүнд халдсан” тухай мэдээг нийгмийн сүлжээ болон мэдээллийн хэрэгслүүдээс харах, цаанадаж түүнийг “алдаж” мэдэх юм.