УИХ-ын гишүүн Ж.Батзандангийн санаачилгаар БНСУ-д Элчин сайдаар томилогдохоор нэр дэвшсэн Б.Хурцын асуудлаар нээлттэй сонсгол явуулах хүсэлтийг УИХ-ын 21 гишүүн дэмжсэн. Энэ асуудлыг өнөөдөр УИХ дахь Аюулгүй байдал, гадаад бодлогын байнгын хорооны хуралдаанаар хэлэлцэж, УИХ-ын чуулганаар Элчин сайдыг чөлөөлөх, томилох асуудлыг хэлэлцэхээс өмнө нээлттэй сонсгол явуулахаар боллоо.

Нээлттэй сонсголыг тус байнгын хорооны дарга О.Содбилэг ахлах бөгөөд УИХ-ын гишүүн Ж.Батзандан, Т.Аюурсайхан, Л.Болд, Н.Номтойбаяр, О.Баасанхүү, Б.Энх-Амгалан нарын бүрэлдэхүүнтэй сонсгол зохион байгуулах Ажлын хэсэг байгуулав.

Нээлттэй сонсгол явуулах хүсэлт ирснээс хойш 14 хоногийн дотор товлон хуралдуулах, яаралтай тохиолдолд цаг зарлан нээлттэй сонсголыг зохион байгуулах боломжтой байдаг аж. 

Элчин сайдыг томилох санал ирснээс хойш УИХ долоо хоногийн дотор асуудлыг хэлэлцэн батлах ёстой. Эл хугацаа энэ долоо хоногоор дуусах тул амжиж Элчин сайдыг томилох учиртай. Тиймээс маргааш ажлын хэсэг нээлттэй сонсголыг зохион байгуулж магадгүй юм.