Улаанбаатарт ослын буулт хийсэн АНУ-ын цэргийн онгоцыг манай талаас засах тоног төхөөрөмж байхгүй учраас АНУ-ын талаас цэргийн зориулалттай дахин "С-17" маркийн хоёр онгоц ирэхээр болжээ. Тус хоёр цэргийн онгоц энэ сарын 31-ний өдөр Улаанбаатарт газардах бөгөөд ослын буулт хийсэн онгоцыг засварлах техник тоног төхөөрөмж авчирч байгаа аж.

Энэ сарын 14-ний өдөр “Чингис хаан” олон улсын нисэх онгоцны буудалд АНУ-ын цэргийн зориулалттай, "С-17" маркийн TREK-973 дуудлагатай ачааны нисэх онгоцны нэг хөдөлгүүр бүрэн зогсож, ажиллагаагүй болсны улмаас ослын буулт хийсэн юм. Манай улсын шуурхай баг хуралдаж, осол гэмтэлгүй хэвийн газардсан талаар бид мэдээлсэн. Тус цэргийн зориулалттай онгоцны дөрвөн хөдөлгүүрийн нэг агаарт бүрэн ажиллагаагүй болсон тул манай талд яаралтай мэдэгдэж, ийнхүү газардсан байдаг.

Одоогийн байдлаар ослын буулт хийсэн онгоцыг манай талаас засварлах ямар ч боломжгүй байгаа бөгөөд Чингис хаан нисэх онгоцны буудлын талбайд зогссон хэвээр байгаа ажээ.