АН-ын "дотор халуун" ид дундаа өрнөж явна. Дээрээ "нудралцаж" байх зуур доор байгаа нөхөд нь хүртэл намаа бужигнуулж явна. Том жижиг фракциудын дүрэмгүй "зодоон" өрнөж иргэдийн дундах АН-ын рейтинг нь навс унах энэ агшинд багачууд болох "хурган" дарга нар нь хүртэл асуудал үүсгэж явна. Ядархад ярь гэгчийн үлгэрээр АН-ын угшилтай Д.Пүрэвдаваа гэгч Баянзүрхийг үнэндээ "бужигнуулж" явна.

Цахим сайтууд болон хэвлэлийн хуудсаар түүнтэй холбоотой сайн мэдээ ховорхон. Хамгийн сүүлд "Засаг дарга Д.Пүрэвдаваа өнгөрсөн оны арваннэгдүгээр сард ажлын байран дээрээ  өөрийн ажилтан болох жирэмсэн эмэгтэйг зодож танхайрсан" гэх мэдээлэл олны анхаарлыг татлаа. Энэ талаар хохирогч бүсгүй Н.Эрдэнэ гэгч эмэгтэй хэвлэлд ярилцлага өгч түүний талаар тун таагүй үгсийг унагасан юм. Тодруулбал "Зодуулсны улмаас түүний биеийн байдал тааруу, хэвлийд нь бүрэлдэж байгаа ураг зодуулсны улмаас доошилж, зулбах аюулд хүрсэн гэнэ. Түүгээр ч зогсохгүй бүсгүй тархиндаа гэмтэл авсан бөгөөд уг гэмтэл нь нугасандаа орсон гэж эмч нар оношилсон" гэсэн юм.

Гэтэл үүнээс хэдхэн хоногийн дараа Баянзүрх дүүргийн Засаг дарга Д.Пүрэвдаваа мэдээлэл хийж "Миний нэр хүндэд зориудаар халдаж байна. Би түүнийг зодох байтугай нэг ч удаа гар хүрч байгаагүй. Би түүнийг зодож дарамталсан удаагүй. 2016 оны нэгдүгээр сарын 26-ны өдөр намайг иргэдтэй уулзалт хийж байхад гаднаас дайрч орж ирсэн. Би тэр үед түүнтэй ярилцалгүй, түлхэж сандал дээр суулгасан. Би амьдралдаа эмэгтэй хүнд гар хүрч үзээгүй. Хүүхэд, гэр бүл хөгжлийн төвийн даргын албан тушаал хашиж байхдаа Н.Эрдэнэ алдаа дутагдал их гаргасан байдаг. Ажилчдынхаа цалинг хасч, өвчтэй байгаа ажилтандаа хүртэл арга хэмжээ авч байсан байдаг" гэж тайлбар хийснээр уг үйл явдал намжсан юм.

Тэгвэл хохирогч эмэгтэй "Хүний эрхийн үндэсний комисс"-д гомдол гаргаж түүнийг нь тус газраас хянаж үзээд Д.Пүрэвдавааг буруутай гэж үзжээ. Улмаар Нийслэлийн засаг дараг бөгөөд Улаанбаатар хотын захирагч Э.Бат-Үүлд хандаж шаардлага хүргүүлжээ. Тэрхүү шаардлагад нь "Д.Пүрэвдаваагийн зүгээс Д.Оюунтуяад үзүүлж буй ажлын байрын дарамт, ялгаварлан гадуурхалтыг таслан зогсоох, цаашид аливаа хөдөлмөрийн харцилаанд энэ төрлийн зөрчил гаргуулахгүй байх талаар холбогдох арга хэмжээг авахыг хотын даргаас шаардсан юм. Үүнийхээ хариуг долоо хоногийн дотор өгөхийг ч бас давхар шаардсан байна. Гэтэл хэд хэдэн эмэгтэйчүүдтэй зүй бусаар харьцсан Д.Пүрэвдаваа нь өөрийгөө буруугүй мэтээр олон нийтэд ярьж, түүнд хариуцлага тооцох албан шийдвэр гарсан байхад хотын дарга нь хайцаалж байгаа нь хэр зөв бэ. Дээрээ суудлаа олохгүй хагаралдан тэмцэлдэж байгаа энэ үед ядархад яр гэгчээр Баянзүрхийн засаг ноён юу билээ дээ.

Түүгээр ч барахгүй Д.Пүрэвдаваа гэгч энэ эрхэм аль бичигт гарын үсэг зурах ёстой, ёсгүйгээ ч мэдэхгүй яваа нэгэн бололтой. Цагаан дээр хараар бичсэн Баянзүрх дүүргийн засаг даргын тамгийн газрын даргын тушаал дээр "Засаг дарга Д.Пүрэвдаваа" хэмээн гарын үсэг зурчихсан тууж явна. Энэ арай дэндэнээ. АН-д бүхэл бүтэн дүүргийн засаг даргаар тавьчих олигтой боловсон хүчин байхгүйн илрэл энэ үү. Аль эсвэл энэ хүн хэдэн эмэгтэйчүүдийг дээрлэхээс өөр зүйл хийж чаддаггүй юм болов уу.