Монгол Улсын Их Хурлын дарга Зандаахүүгийн Энхболд 2016 оны 03 дугаар сарын 06-08-ны өдрүүдэд Өмнөговь, Дундговь аймагт ажиллалаа. Улсын Их Хурлын даргын Өмнөговь, Дундговь аймагт ажилласан талаарх мэдээллийг багцлан хүргэж байна.

2016 оны 03 дугаар сарын 06. Ням гараг.

УИХ-ын дарга говийн бүсийн “Тэмээчдийн зөвлөгөөн”-ий нээлтэд оролцов

Монгол Улсын Их Хурлын дарга Зандаахүүгийн Энхболд 2016.03.06-ны өдөр Өмнөговь аймагт хүрэлцэн ирэхэд аймгийн удирдлагууд угтан авсан юм.
Өмнөговь аймаг тэмээн сүргийнхээ тоогоор улсдаа тэргүүлдэг бөгөөд аймгийн Иргэдийн Төлөөлөгчдийн Хурал, Засаг даргын Тамгын газраас санаачлан “Монгол тэмээ 999” арга хэмжээг энэ өдрүүдэд зохион байгуулж байна. Тус арга хэмжээний хүрээнд төрөөс тэмээчдийн талаар авч хэрэгжүүлж буй бодлогын талаар санал солилцон, цаашид авч хэрэгжүүлэх арга хэмжээг тодорхойлох, тэмээн сүргийн тоо толгойг нэмэгдүүлэх, тэмээний амьдын үнэлэмжийг нэмэгдүүлэх зорилго бүхий говийн бүсийн “Тэмээчдийн зөвлөгөөн”-ийг зохион байгуулж байгаа юм. Улсын Их Хурлын дарга Өмнөговь аймагт ажиллах эхний өдрөө тус зөвлөгөөний нээлтэд оролцов.

Улсын Их Хурлын дарга зөвлөгөөний нээлтийн үеэр хэлсэн үгэндээ “Зөвлөгөөнд зөвхөн Өмнөговь аймгийн тэмээчид биш, тэмээтэй бүх аймгийн төлөөлөл оролцож байгаа юм байна. Би Улсын Их Хурлын 2015 оны намрын чуулганы завсарлагаанаар аймгуудад ажиллах орон нутгийн томилолтоо Өмнөговь аймгаас эхэлж байна. Сүүлийн үед Засгийн газраас авч хэрэгжүүлж буй олон арга хэмжээ бий. Р.Бурмаа сайдын санаачилсан “Сайн малчин” дунд хугацааны хөтөлбөр хэрэгжиж эхэлсэн. Энэ хүрээнд бүх малчныг сайн малчин болгох зорилт тавьсан. Сайн малчин бол бүх мал нь эрүүл, нийгмийн даатгалын шимтгэлээ төлдөг, малчны дансаа хэрэглэдэг, тамга тэмдэгтэй, амьжиргаагаа авч явах хэмжээний малчин байх хэрэгтэй. Мал эрүүл байх юм бол мах, сүү, арьс ширээ экспортлох боломж малчдад бүрдэнэ. Тиймээс дотоодын хэрэгцээнээс илүү гарсан бүтээгдэхүүнүүдээ экспортлох хэрэгтэй. Үүний тулд мал эрүүл байх шаардлагатай.

 

Төрийн банк малчны зээлийн хүүгээ бууруулсан. Засгийн газрын хэрэгжүүлж буй “Сайн малчин” хөтөлбөрийг хэрэгжүүлж чадах юм бол малчин дансаа ашигладаг бол малчны зээлийн хүү жилийн 18 хувь байгаа нь 10 хувь болж буурна. Төрийн банк бүх зээлийн хүсэлтийг хүлээн авах боломжтой. Төрийн банк гурван төрлийн шалгуур хангасан малчныг энэ сарын 15-наас хөнгөлөлттэй зээлд хамруулах болно.
Дэлхийд байдаг хоёр бөхтэй тэмээний гуравны хоёр нь Өмнөговь аймагт бий. Сүү, сүүн бүтээгдэхүүнийг нь дэлхийн брэнд болгох боломжтой. Тухайлбал, чихрийн шижин өвчнийг ингэний сүүгээр эмнэх боломжтой гэж сонссон. Өнөөдөр 2000 төгрөгийн үнэтэй байгаа ингэний сүү чихрийн шижин өвчнийг эмчилдэг гэдэг нь батлагдвал 20000 төгрөгт хүрэх ч магадлалтай. Өвөрмонголчууд Япон Улс руу ингэний сүү экспортлоод эхэлсэн, бид хоцорч байна. Гэхдээ төр засгаас энэ чиглэлийн арга хэмжээ авч байгаагийн дээр малчид та бүхэн экспортыг зорьж ажиллаарай. Та бүхний ажилд амжилт хүсье” гэлээ.

Дэлгэрэнгүйг эндээс үзнэ үү. 

З.Энхболд: 21 аймагт ипотекийн зээлийн хүү 5 хувь боллоо

Монгол Улсын Их Хурлын дарга Зандаахүүгийн Энхболд говийн бүсийн “Тэмээчдийн зөвлөгөөн”-ий нээлтэд оролцсоны дараа иргэдтэй уулзалт хийв.

Монгол Улсын Их Хурлын 2015 оны намрын чуулганы хугацаанд батлагдсан хууль, тогтоолуудын талаар Өмнөговь аймгийн иргэдэд танилцуулж, мэдээлэл хийв. Танилцуулгынхаа эхэнд Улсын Их Хурлын дарга “Өмнөговь аймагт 1000 тэмээний уралдаан болох гэж байна, нэг дор 1000 тэмээ байх нь гайхалтай харагдах нь лавтай. Гинессийн амжилтаа ахиулахаар мэргэжилтнүүдийг урьж авчирсан байна. Улсын Их Хурлын 2015 оны намрын чуулганы завсарлагаанаар хөдөө орон нутагт ажиллах томилолтоо Өмнөговь аймгаас эхлүүлж байна. Өнөөдөр Та бүхэнд 2015 оны намрын чуулганы хугацаанд батлагдсан хууль, тогтоолуудын тойм, эдийн засгийн зарим асуудал, бүтээн байгуулалт, бонд, мөн барилгын салбар, ипотек, хөдөө аж ахуйн салбарын талаар мэдээлэл хийнэ” хэмээн хэлэв.

Монгол Улсын Их Хурал 2015 оны намрын ээлжит чуулган 90 хоног үргэлжилж, нэгдсэн хуралдаан 38 удаа, Байнгын хороо 131 удаа хуралджээ. Энэ хугацаанд нийт 426 хууль, 64 тогтоол баталсан ба үүний 29 нь бие даасан хууль байв. 355 хуульд нэмэлт, өөрчлөлт оруулсан бол 11 олон улсын гэрээ, конвенц соёрхон батлах тухай хуулийн баталсан болохыг Улсын Их Хурлын дарга танилцуулсан юм.

Эдгээрээс хүний эрх, эрх чөлөөг хангах, хамгаалах чиглэлээр баталсан Эрүүгийн хууль, Зөрчлийн тухай хууль, Анхны ардчилсан сонгууль болж Байнгын ажиллагаатай парламент байгуулагдсаны 25 жилийн ойг тохиолдуулан өршөөл үзүүлэх тухай хууль болон Хүүхдийн эрхийн тухай хууль, Хүүхэд хамгааллын тухай хууль, Хөгжлийн бэрхшээлтэй хүний эрхийн тухай хууль, Хамтын тэтгэврийн тухай хуулиудын талаар танилцууллаа.

Дэлгэрэнгүйг эндээс үзнэ үү. 

УИХ-ын дарга З.Энхболд ӨМӨЗО-ны профессор Н.Журамтыг хүлээн авч уулзав

Монгол Улсын Их Хурлын дарга Зандаахүүгийн Энхболд  Өмнөговь аймагт ажиллах үеэрээ “Монгол тэмээ 999” арга хэмжээний хүрээнд болж буй “Тэмээчдийн зөвлөгөөн”-д оролцож байгаа БНХАУ-ын Өвөрмонголын өөртөө засах орны Хөх хотын Хөдөө аж ахуйн их сургуулийн профессор Н.Журамтыг хүлээн авч уулзав. Тэд уулзалтын үеэр ингэний сүүг тогтмол хэрэглэж заншвал чихрийн шижин өвчнийг анагаах боломжийн талаар ярилцлаа.

Өвөрмонголын өөртөө засах орны эрдэмтэн, судлаачид ингэний сүү нь чихрийн шижин өвчнийг анагаах боломжтойг тогтоосон бөгөөд Япон улсад ингэний сүүний бэлдэц бүтээгдэхүүнийг экспортлож эхэлсэн байна. Өнөөдөр Өвөрмонголын тэмээчид 1 литр ингэний сүүг 100 юаниар худалдаалж байгаа бол боловсруулсан ингэний сүүн бүтээгдэхүүн зах зээл дээр 200 юань байгаа талаар дуулгаад, зарим мэдээллийг танилцуулав.

Дэлгэрэнгүйг эндээс үзнэ үү. 

2016 оны 03 дугаар сарын 07. Даваа гараг.

УИХ-ын дарга Өмнөговь аймгийн бүтээн байгуулалтын ажилтай танилцав

Монгол Улсын Их Хурлын дарга Зандаахүүгийн Энхболдын орон нутгийн томилолт Өмнөговь аймагт үргэлжилж тэрээр Даланзадгад сумын бүтээн байгуулалтын ажлуудтай танилцлаа.

90 га талбайд инженерийн дэд бүтцийг цогцоор нь байгуулаад буй Шинэ суурьшлын бүсийн бүтээн байгуулалтын ажилтай Улсын Их Хурлын дарга танилцав. Даланзадгад сумын хэсэгчилсэн ерөнхий төлөвлөгөөний дэд бүтцийн төслүүдийг хэрэгжүүлэхдээ аймгийн төвийн хөгжилд шийдвэрлэх үүрэг бүхий зам, тээврийн болон инженерийн шугам сүлжээ, түүнчлэн ус, дулаан, цахилгаан, холбооны найдвартай эх үүсвэрийг эхний ээлжинд барьж байгуулах, өргөтгөх, шинэчлэх чиглэл баримтлан ажилласны хүрээнд орон нутгийн төсвөөс 21 тэрбум 813 сая төгрөгийг зарцуулжээ.

Үүний үр дүнд Даланзадгад сумын Засаг даргын Тамгын газар 200 хүүхдийн цэцэрлэг, 128 айлын орон сууц, 44 айлын амины орон сууц зэрэг барилга байгууламж болон 3.1 км хатуу хучилттай автозамыг ашиглалтад оруулсан байна. Хэсэгчилсэн ерөнхий төлөвлөгөөг 2009-2021 он хүртэл 3 үе шаттай байхаар тооцож ойрын хугацааг 2009-2012 он, дунд хугацааг 2012-2015 он, төлөвлөлтийн хугацааг 2015-2021 он байхаар тус тус тогтоосон байна. Нийт 90 га тус бүсэд 2376 өрх, 9138 хүн ам суурьшин амьдрахаар төлөвлөгдсөнөөс 98.6 хувь нь нийтийн орон сууцанд, 1.4 хувь нь амины орон сууцанд байхаар тооцжээ. Мөн Засаг захиргааны бүс, нийгмийн дэд бүтцийн бүс, ногоон байгууламж амралт зугаалгын бүс, зам  талбайг төлөвлөсөн байна. Уул уурхайн жишиг сургууль, Даланзадгад сумын Засаг даргын Тамгын газар, аймгийн төв музей, 850 хүний суудалтай театр, усан спорт цогцолбор, 1200 хүүхдийн сургууль, 200 хүүхдийн цэцэрлэг, автозам, явган хүний зам, зэрэг томоохон барилга байгууламжуудыг мөн барихаар төлөвлөжээ.

Засгийн газраас хэрэгжүүлж буй "Аймаг бүрт 1000 айлын орон сууц хөтөлбөр"-ийг Өмнөговь аймагт хэрэгжүүлэх ажилд оролцож буй “Бандиа” ХХК-ийн барьж буй 138 айлын амины орон сууц барих барилгын угсралтын ажлын явцтай Улсын Их Хурлын дарга танилцлаа. Тус компани Өмнөговь аймгийн Засаг даргын Тамгын газартай хийсэн хамтын ажиллагааны гэрээний дагуу ЗДТГ-аас тус хотхон хүртэлх дэд бүтэц цахилгаан, дулаан, цэвэр бохир усны шугам татах ажил болон 7.9 га газар олголтыг шийдвэрлэж өгсөн байна.

Дэлгэрэнгүйг эндээс үзнэ үү. 

УИХ-ын дарга З.Энхболд нарны эрчим хүчээр ажилладаг ус өргүүр худаг байгуулж буй төслийн явцтай танилцлаа

Монгол Улсын Их Хурлын дарга Зандаахүүгийн Энхболд малчдын хөдөлмөрийг хөнгөвчлөх, бэлчээрийн усан хангамжийг нэмэгдүүлэхээр хэрэгжүүлж буй нарны эрчим хүчээр ажилладаг ус өргүүр худаг байгуулж буй төслийн явцтай танилцав.

2013 онд нарны эрчим хүчээр ажилладаг ус өргүүр суурилуулах ажлыг Ханхонгор, Сэврэй суманд туршиж эхэлсэн байна. Уг төхөөрөмж нь мал аж ахуй, газар тариаланг хослон эрхлэхэд үр дүнтэй бөгөөд цаг хугацаа хэмнэсэн, хямд зардлаар мал, ногоогоо зэрэг услах боломжтой үр ашигтай төхөөрөмж болох нь нотлогдсон болохыг Улсын Их Хурлын даргад танилцуулав.

Тиймээс 2015 онд 15 сумын 29 инженерийн хийцтэй худагт уг төхөөрөмжийг суурилуулах ажлыг Сэргээгдэх эрчим хүчний үндэсний төв, "Ундарга-Өмнөговь" ХК-тай гэрээ байгуулан хэрэгжүүлж байгаа аж. Үүний нэг нь Даланзадгад сумын 8 дугаар багийн Цох сувагийн худаг юм. Сүүлийн 4 жилийн хугацааны ажлын үр дүнд  бэлчээрийн усан хангамж 38-42.5 хувьд хүрсэн байна.

Дэлгэрэнгүйг эндээс үзнэ үү. 

УИХ-ын дарга З.Энхболд “Монгол тэмээ 999” арга хэмжээнд оролцов

Монгол Улсын Их Хурлын даргын орон нутагт ажиллаж буй томилолт Өмнөговь аймагт үргэлжилж байна. Дэлхийн хоёр бөхт тэмээний цөм нутгийн хувьд Өмнөговь аймаг 1000 тэмээ уралдуулж, дэлхийн дээд амжилтыг шинэчлэн бүртгүүлэхээр “Монгол тэмээ 999” арга хэмжээг зохион байгуулж байгаа юм.

Энэ хүрээнд 1000 тэмээний уралдаан, говийн бүсийн “Тэмээчдийн зөвлөгөөн”, Ингэний сүү, цагаан идээ, тэмээний ноосон бүтээгдэхүүний үзэсгэлэн худалдаа, тэмээний үзэсгэлэн, тэмээний зан үйлтэй холбоотой олон төрөлт буухиа тэмцээн, “Сайхан тэмээтэй сайхан хос” шалгаруулах уралдаан, шилмэл буур, ингэ шалгаруулах зэрэг олон арга хэмжээг зохион байгуулжээ.

1000 тэмээний уралдаан 03 сарын 07-ны өдөр зохион байгуулагдаж байгаа бөгөөд Өмнөговь аймгийн 15 сумын тэмээчид оролцож байгаа бөгөөд бусад аймаг сумдаас ч энэхүү уралдаанд нээлттэй оролцож байгаа юм. Улсын Их Хурлын дарга З.Энхболд дагалдан яваа албаны хүмүүсийн хамтаар 1000 тэмээний  уралдааныг үзэж, сонирхлоо.

Ийнхүү Улсын Их Хурлын дарга Өмнөговь аймагт ажиллах томилолтоо өндөрлүүлж, Дундговь аймагт ажиллахаар мордлоо.

Дэлгэрэнгүйг эндээс үзнэ үү. 

УИХ-ын дарга З.Энхболд Дундговь аймгийн иргэдтэй уулзалт хийв

Монгол Улсын Их Хурлын дарга Зандаахүүгийн Энхболд Өмнөговь аймагт ажилласны дараа Дундговь аймагт орон нутагт ажиллах томилолтоо үргэлжлүүлэн иргэдтэй уулзалт хийж, Монгол Улсын Их Хурлын 2015 оны намрын ээлжит чуулганы хугацаанд баталсан хууль, тогтоолуудын талаар дэлгэрэнгүй танилцуулга хийлээ.

Уулзалтын эхэнд Улсын Их Хурлын гишүүн Б.Наранхүү Дундговь аймгийн иргэдэд, УИХ-ын даргын энэ удаагийн айлчлалын үеэр ард иргэдийн амьдралд нэн хэрэгтэй, Засгийн газраас хэрэгжүүлж буй олон арга хэмжээний талаар дэлгэрэнгүй мэдээлэл өгөх болно гэв. Мөн "Өвөлжилт чамгүй хүнд байсан ч гэсэн малчдын бэлтгэл, нөр хөдөлмөрийн үр дүнд нөхцөл байдал сайн байгаа талаар сонссон. УИХ-ын даргын уулзалтын үеэр иргэд та бүхэн тодруулахыг хүссэн зүйлээ чөлөөтэй асуугаарай" хэмээсэн.

УИХ-ын дарга З.Энхболд 2015 оны намрын ээлжит чуулганаар хэлэлцэн баталсан хууль, тогтоолын талаар танилцуулга хийсний дараа Мандалговь сумын иргэдийн сонирхсон асуултад хариулт өглөө.

Мандалговь сумын иргэд Сонгуулийн хуулийн тухай,  МХЕГ-ын үйл ажиллагаа, сумын төвийн шинэчлэлд хамрагдсан 100 сумын тухай, уул уурхай болон хөдөө аж ахуйд суурилсан эдийн засгийн хөгжил, хууль бус алт олборлолт, ипотекийн зээлийн тухай болон бусад УИХ-ын үйл ажиллагаатай холбоотой асуудлаар асуулт асуув.

УИХ-ын дарга З.Энхболд улс төрийн намын тухай асуудлууд бус зөвхөн Улсын Их Хурлын үйл ажиллагаатай холбоотой асуудлуудаар Мандалговь сумын иргэдэд хариулт өглөө. 

Дэлгэрэнгүйг эндээс үзнэ үү. 

2016.03.08. Мягмар гараг

УИХ-ын дарга Дундговь аймгийн зарим аж ахуйн нэгжийн үйл ажиллагаатай танилцав

Монгол Улсын Их Хурлын дарга Зандаахүүгийн Энхболд Дундговь аймагт ажиллах үеэрээ үйлдвэрлэл эрхлэгчидтэй уулзаж, үйл ажиллагаатай нь танилцав. 

Дундговь аймгийн нийт  15 сумын хэмжээнд 78 үйлдвэр, цех хүнсний үйлдвэрлэлийн үйл ажиллагаа явуулж, 255 гаруй хүн ажилладаг байна. Эдгээр үйлдвэрлэгчид орон нутгийн хэрэглэгчдийн хүнсний хэрэгцээний 45-50 хувийг хангадаг бөгөөд Улсын Их Хурлын дарга хүнсний үйлдвэрлэл эрхлэгч “Говийн гэгээ” ХХК-ийн үйл ажиллагаатай танилцлаа. Тус компанийн захирал Н.Эрдэнэбат 2003 оноос өрхийн үйлдвэрлэл эрхэлж, 2011 онд компани байгуулан, үйл ажиллагааг нь өргөжүүлжээ. Одоо “Говийн гэгээ” ХХК 20 гаруй нэр төрлийн хүнсний бүтээгдэхүүн үйлдвэрлэн, сард дунджаар 8 сая орчим төгрөгийн борлуулалт аймгийнхаа хэмжээнд хийдэг байна. Өнөөдрийн байдлаар 8 хүнийг тогтмол ажлын байраар ханган, нийгмийн даатгалын шимтгэлийг төлж байгаа талаараа тус компанийн захирал Улсын Их Хурлын даргад танилцуулав.

Дундговь аймагт жижиг дунд үйлдвэрлэл эрхэлдэг бүртгэлтэй 500 гаруй иргэн, аж ахуй нэгж байдаг бөгөөд Улсын Их Хурлын дарга тус аймагт ажиллах үеэрээ модон эдлэлийн үйлдвэрлэл эрхэлдэг “Агь” мужааны цехийн үйл ажиллагаатай танилцсан юм. Мандалговь суманд 3 аж ахуйн нэгж модон эдлэлийн үйлдвэрлэл эрхэлж байгаа ба “Агь” мужааны цех  2007 оноос хойш гэрийн мод, модон эдлэл болон төрөл бүрийн тавилга үйлдвэрлэж байгаа юм байна. Тус цехийн захирал Г.Цэрэндаш Улсын Их Хурлын даргад үйл ажиллагааныхаа талаар танилцуулах үеэрээ “Манай аймгийн урчуудын хийсэн гэрийн мод эрт үеэсээ алдартай. Тиймээс аймаг орон нутгийнхаа нэрийг гаргах брэнд бүтээгдэхүүн үйлдвэрлэх зорилготой ажиллаж байна. Үүний тулд бүтээгдэхүүний чанарт өөрөө хяналт тавьж, ажилчдынхаа ур чадварыг сайжруулахад анхаарч, мужаанууддаа зааж зөвлөн ажилладаг” гэв. Сард дунджаар 5-6 сая төгрөгийн борлуулалт хийдэг байна. Өнөөдрийн байдлаар 6 хүнийг тогтмол ажлын байраар хангаж байгаа ч бүтээгдэхүүний захиалга нэмэгдэн, ачаалал ихсэх үед 4-5 туслах ажилчин нэмж ажиллуулдаг талаараа Улсын Их Хурлын даргад танилцууллаа.

Улсын Их Хурлын дарга Дундговь аймгийн МСҮТ-ийн шинэ байртай танилцав. Тус сургалтын төвд 2015-2016 оны хичээлийн жилд 400 орчим сурагч 16 төрлийн мэргэжил эзэмшиж байгаа аж.

Үүний дараа уурын зуухны тогоо үйлдвэрлэдэг “Ган илч” компанийн үйл ажиллагаатай танилцав. Тус компани аймгийнхаа ЖДҮ-ийн сангаас 800 сая төгрөгийн зээл авсан бөгөөд үйлдвэрийн байраа энэ онд ашиглалтад оруулахаар ажиллаж байгаа аж. Үйлдвэрийн бүтээгдэхүүн, технологи, түүхий эдийнхээ талаар мэдээлж, Улсын Их Хурлын дарга “Танай хэрэглэж буй лист төмрийг Орхон аймгийн “Бэрэн” компани үйлдвэрлэж байгаа тул цаашид дотоодын түүхий эдээ ашиглах тал дээр судлах нь зүйтэй” гэсэн юм.