Шинэчлэлийн Засгийн газрын бүтцийн дагуу өмнө нь байсан ССАЖЯ татан буугдсан. Тус яамныхан татан буугдах нь тодорхой болсноосоо хойш бужигнаж эхэлжээ. Гэхдээ энэ нь өвөрмөц бужигнаан. Татан буугдах болсноосоо хойш тус яамны удирдлагууд “Соёлын тэргүүний ажилтан” цол, тэмдгийг баруун солгойгүй тараасан байна.

Энэ тэр дарга, гишүүдэд “Соёлын тэргүүний ажилтан” цол, тэмдэг өгч тал засах нь хэрээс хэтэрч, сүүлдээ экс сайдыгаа ичээхэд хүргэжээ. Юу болсныг тодруулбал татан буугдсан ССАЖЯ-ныхан саяхан хуучин аппаратаараа шинэ жилээ тэмдэглэжээ. Гэтэл тэр шинэ жилийн цэнгүүн дээр ССАЖ-ын сайд асан, УИХ-ын гишүүн Ц.Оюунгэрэлийг Монгол Улсын “Соёлын тэргүүний ажилтан” цол, тэмдгээр шагнажээ.

Гэтэл уг цол, тэмдэгний үнэмлэх Ц.Оюунгэрэл гишүүний өөрийнх нь гарын үсэгтэй байсан гэнэ. Гэнэт ийнхүү өөрөө өөрийгөө шагнаж, СТА болсондоо Ц.Оюунгэрэл гишүүн ч цочирдож, бас ичсэн байна. Хэтийдсэн бялдуучлал гэж энийг хэлэх биз. Нөгөө төлөөр татан буугдсан ССАЖЯ-ныхан буцах бэрд үнээ тугал нийлэх хамаагүй гэдэг шиг аашилж байгаагийн нэг жишээ энэ боллоо.