Уул уурхай, хүнд үйлдвэрийн сайд Г.Дамдинням Засгийн газрын мэдээллийг танилцуулах үеэр шатахууны хэрэглээтэй холбоотой тайлбарыг өглөө. Тэрээр "Өнөөдрийн Засгийн газрын хуралдаанаар түлш, шатахууны хангамжтай холбоотой асуудлаар мэдээлэл хийж, тэмдэглэл гаргуулж байна. Бид зохиомол хомстолтой нүүр тулаад байна. Ердийн үед Улаанбаатар хотын хэмжээнд өдөртөө 950-1200 тонн шатахуун хэрэглэдэг бол өнөөдөр 1800 тонныг нийлүүлээд ч хангалтгүй байна.

ОХУ нь бидний нийт хэрэглээний 92 хувийг дангаараа хангадаг. Тус улсын 22 шатахууны үйлдвэр дайны цохилтод өртөж, эвдэрч хэмхэрсэнтэй холбоотойгоор ОХУ-ын Засгийн газраас  АИ 92 шатахуун дээр хязгаарлалт тавьсан. Засгийн газар хоорондын хэлэлцээртэй тул уг хязгаарлалтад Монгол Улс багтахгүй.

Бид энэ сард 58 мянган тонн АИ 92 шатахууны зөвхөн Роснефть компаниас, үлдсэнийг нь Газформ болон БНХАУ-аас авахаар гэрээ хэлцэл хийгээд явж байна. Бидний гол нийлүүлэлтийг хангадаг Ангарскийн үйлдвэр нь төлөвлөгөөт засвараа саяхан хийгээд  энэ сарын 15-нд дуусгасан. Тиймээс бидэнд нийлүүлж буй бүтээгдэхүүний хэмжээ багассан. Энэ асуудлаар Ерөнхий сайд Г.Занданшатар ОХУ-ын Ерөнхий сайдтай холбогдож байгаа. Миний хувьд ОХУ-ын Эрчим хүчний яамтай холбогдсон.

Иргэддээ уриалахад банкаа бүтэн дүүргэх гэж сандарч тэвдэлгүй авдаг хэмжээндээ аваачээ. Хэрэглээ хоёр дахин өссөн учир Улаанбаатарт 2000 тонныг нийлүүлээд ч ховх сорогдоод байна.  

Тиймээс Улаанбаатарт хязгаарлалт хийнэ. Иргэд тайван байвал хэвийн хэмжээндээ шилжинэ. БНХАУ-аас сардаа 3500 тонн евро-5 стандартын шатахууныг авдаг. Энэ сард бид 7000 тонныг захиалсан. Гэвч энэ удаагийн шокноос болж бас л хүрэлцэхгүй байна" гэлээ.