Төрийн өндөр албан тушаалтнууд АТГ-т 2024 оны хөрөнгө орлогын мэдүүлгийг шинэчлэн гаргасан байна. Энэ хүрээнд бид ТӨХК-иудын удирдлага нарын ХОМ-ийг хүргэж байгаа билээ.

Тэгвэл энэ удаа ”Монголын хөрөнгийн бирж” ХК -ийн Гүйцэтгэх захирлын үүргийг түр орлон гүйцэтгэгч  Б.Дөлгөөний ХОМ-ыг хүргэж байна.

Тэрээр өмнөх Засгийн газрын үед буюу 2025 оны 1 дүгээр сард Гүйцэтгэх захирлын үүргийг түр орлон гүйцэтгэгчээр түүнийг томилогдсон.  Гэтэл тэрээр удирдлагын ажил авсан цагаасаа хойш хувийн амбиц, алдар нэрийн араас улайран хөөцөлдөж, хаана л хурал, форум юу л таарна сэдэв голохгүй нэр, зургаа даруулан явж харагддаг.

Түүгээр ч үл барам МХБ-ийн үндсэн хуульчид нь өдөр тутмын ажлаа хэвийн явуулж байхад тэрээр гаднаас хуулийн фирм байршуулж байгууллагын дотоод мэдээллийг ашиглуулаад зогсохгүй,  НИТХ-ын сонгуульд өөрийнх нь сошиал сувагт видео, текст оруулж ажилласан багийнхнаасаа биржид ажиллуулан цалинжуулж, биржийн ажилтан мэт дуртай цагтаа орж гардаг гэх шүүмжлэлд ч өртөөд авсан.

Хамгийн ноцтой нь, гурван давхар дээлтэй болсон НИТХ-ын төлөөлөгч Б.Дөлгөөн нь биржийн удирдлага болмогцоо өөрийнхөө цалинг өмнөх удирдлагын цалингаас 4 дахин өндөр буюу 20 сая төгрөг болгуулаад зогсохгүй, “Нийслэлийн орон сууцны корпораци” ХК-ийн Төлөөлөн удирдах зөвлөлийн гишүүнээр 2025 оны 03 дугаар сард буюу МХБ-ийн ГЗҮТОГ-ээр томилогдсоноос хойш ажилд оржээ. Ингэхдээ  “Монголын хөрөнгийн бирж” ХК-ийн ТУЗ-д урьдчилан мэдэгдэж, зөвшөөрөл аваагүй гэх мэдээлэл бий.

Товчхондоо, тэрбээр “Монголын хөрөнгийн бирж” ХК-ийг улс төрийн карьер ахих шат дамжлагаа болгон ашиглаж, улс төрийн ашиг хонжоондоо хэрэглүүр болгон ашиглах болсон энэ.

Тэгвэл  НИТХ-ын төлөөлөгч, Нийслэлийн орон сууцны корпорацийн ТУЗ-ийн гишүүн, МХБ-ийн Гүйцэтгэх захирлын үүргийг түр орлон гүйцэтгэгчээр ажилладаг нийт 3 газраас давхар цалин авдаг Б.Дөлгөөний 2024 онд АТГ-т шинэчлэн мэдүүлсэн ХОМ-ийг хүргэж байна.

Түүний орлого нь 69 сая төгрөгөөс 126 сая төгрөг болж, нэг жилийн хугацаанд 57 сая төгрөгөөр ӨСЖЭЭ. Энэ бол зөвхөн ХОМ мэдүүлсэн хөрөнгө төдий...

Тэрбээр мэдүүлэгтээ:

Өөрийн орлого: ₮126 сая
Гэр бүлийн орлого: ₮38 сая
Хөрөнгө борлуулсны орлого: ₮0 сая
Орон сууц барилга байгууламж: ₮699 сая  /Орон сууц-2/
Тээврийн хэрэгсэл:  ₮0 сая
Мал аж ахуй: ₮0 сая
Газар: ₮15 сая  /Өмчлөх-528м2/
Үнэт эдлэл, урлаг, түүхийн үнэт зүйл: ₮29 сая
Хадгаламж: ₮31 сая     
Авлага: ₮0 сая
Зээл:  ₮89 сая гэж мэдүүлжээ.

“Монголын хөрөнгийн бирж” ХК-ийг улс төрийн амбицаа тэжээдэг дамжлагаа болгож буй Б.Дөлгөөнд хариуцлага асуудал яригдахгүй юм уу? Сангийн яамнаас асууя.