Өмгөөлөгч Б.Мэргэн “Би чиний ажилтан юм уу О.Алтангэрэл ээ” гэж өөрийн байр сууриа илэрхийлжээ.

Тэрээр, "Өмнө нь өмгөөлөгч жилд хоёроос доошгүй хүнийг үнэгүй өмгөөлнө (про боно) гэсэн хуультай байлаа. Энэ нь зах зээлийн нийгэмд хүний хөдөлмөрийг шулсан зүйл гэж үзсэн учраас төрөөс цалинжуулж төлбөрийн чадваргүй хүмүүсийг өмгөөлдөг бүтэцтэй болгосон.

Цалин авч ажилладаг улсын өмгөөлөгчтэй байгууллагатай болсон гэсэн үг. Хууль зүйн туслалцаа үзүүлэх тухай хуультай бөгөөд хуулиар зохицуулаагүй харилцааг нь сайдын баталсан журмаар зохицуулж байв.

Эдгээр хууль болон журам байсан байгаагүй өмгөөлөгчид маань сайн дураараа холбоотойгоо хамтраад про боно зөндөө хийдэг. Миний хувьд УИХ-ын гишүүний хүчингийн гэх хэргийн хохирогчийг үнэгүй өмгөөлье гэж санал гаргаж өмгөөллийн анхны ажлаа эхлүүлсэн цагаасаа олон ч удаа про боно үйлчилгээ үзүүлсэн.

Ялангуяа хүүхдийн холбогдсон, хохирсон хэрэг дээр төлбөр аваад байдаггүй. Тоолоод үзвэл жилдээ 10 орчим болчихсон л байдаг юм.  Тиймдээ ч өмгөөлөгчдөө төлөөлөөд зурагт байгаа про боно хуралд оролцож байлаа

Гэтэл сайд маань журмыг шинэчлэн баталжээ.

• Өмгөөлөгчдийн холбоо долоо хоногт хоёроос доошгүй өмгөөлөгч ажиллуулахад бэлэн байлгаж хуваарь гаргана
• 24 цагаар жижүүрлэн ажиллуулна
• Өмгөөлөхөөс татгалзах эрхгүй. Зөрчвөл хариуцлага хүлээлгэнэ.

Хууль зүйн туслалцаа үзүүлэх тухай хуулийн 3.1-т “ТӨРӨӨС хууль зүйн туслалцааг үнэ төлбөргүй үзүүлэхтэй холбогдох харилцааг энэ хуулиар зохицуулна.” гэж хүрээг нь зааж өгсөн байдаг юмаа. “Төрөөс” шүү. Хүчээр томилогдсон өмгөөлөгч ядаж л сэтгэл гаргах болов уу.

Хувийн эмнэлгийн эмч нар төрөөс баталсан багахан хөлсөөр эмчил, үйлдвэрлэгчид бараагаа хямд зар, салбар бүрийнхэн хуваарь гаргаад үйлчилгээ үзүүл гээд үргэлжлэх юм уу, эсхүл.

Нэмээд хэлэхэд сайдын батлах журам хуульд үндэслэж, нийцсэн байх ёстой. Ямар хуульд журам батлах эрхийг өөрт нь олгосон гэдгийг тушаалдаа бичдэг юмаа.

Бүх салбарын журмыг хуульд нийцэж байна уу гэдгийг шалгаад, нийцэхгүй бол буцаагаад, нийцэж байвал бүртгээд хүчин төгөлдөр болгодог яамны сайд нь өөрөө тушаал батлахдаа үндэслэж байгаа хуулийн зүйл, заалтаа бичдэггүй юм гэнэ ээ. Аа бас баталсныхаа дараа өмгөөлөгч нартай уулзаж санал сонсож нтр. Муу нэртэй ч Х.Нямбаатар сайд байхдаа хуульдаа нийцүүлээд, үндэслэлээ дурдаад өмнөх журмыг баталсан байдаг юм шүү. Өөрөө өмгөөлөгч байсан хүн сайд болоод хэн байснаа мартчихдаг л юм байна. За тэгээд болохгүй бол захиргааны шүүх дээр уулзъя даа." гэжээ.