УИХ-ын гишүүн, Уул уурхайн дэд сайд, Шүүхийн шийдвэр гүйцэтгэлийн ерөнхий газрын дарга зэрэг алба хашиж ирсэн, бригадын генерал Д.Загджав өнгөрсөн сарын 28-ны өдөр /2023.12.28/ Үндэсний аудитын газрын ерөнхий аудиторын орлогчоор томилогдож, ажлаа хүлээн авчээ.

Үндэсний аудитын газрын ерөнхий аудитор Д.Занданбат ирэх онд сонгуульд нэр дэвших гэж буйтай холбоотойгоор ажлаас чөлөөлөгдөх хүсэлтээ өгч, өнөөдрийн УИХ-ын чуулганаар түүнийг хүсэлтийг хүлээн авч шийдвэрлэсэн билээ.

МАН 2016 оны УИХ-ын сонгуульд үнэмлэхүй ялалт байгуулсны дараа Д.Загджав Уул уурхай хүнд үйлдвэрийн дэд сайд болсон. Дараа нь 2020 оны УИХ-ын сонгуулийн дараа Шүүхийн шийдвэр гүйцэтгэлийн ерөнхий газрын даргаар томилогдсон. 

Шүүхийн шийдвэр гүйцэтгэлийн ерөнхий газрын даргаар ажиллаж байхад нь түүнтэй холбоотой дуулиан дэгдэж, Хууль зүй дотоод хэргийн яамнаас ажлын хэсэг гарч, ажилласнаар эцэст нь тэрбээр чөлөөлөгдөж байв.

Учир нь, цагдан хорих газраас хоригдлууд оргох, хоригдож байсан хүн нас барсан, мөн шүүхийн шийдвэрийн ажилтан цагдаагийн алба хаагчийн биед халдсан гэх олон зөрчил гарсан тул түүнийг чөлөөлөх асуудал яригдаж байсан юм.  

Д.Загджавын хувьд  тэрбээр энэ удаад чоно борооноор гэгчээр шинэ жилийн олны анхаарал сарнисан үеэр Үндэсний аудитын газарт алба хаших боллоо.