Засгийн газрын хуралдаанаас гарсан шийдвэрийг танилцууллаа.

Метро барихтай холбоотой түүхэн шийдвэрийг Засгийн газар гаргасан талаар Улаанбаатар хотын авто замын түгжрэлийг бууруулах үндэсний хорооны дарга Б.Дэлгэрсайхан танилцууллаа.

Түгжрэлийг бууруулах үндэсний хорооны дарга Б.Дэлгэрсайхан “Засгийн газрын өнөөдрийн хуралдаанаар метро буюу их хэмжээний багтаамжтай тээврийн хэрэгслийн танилцуулгатай холбоотой үүрэг өглөө. Эдгээр тээврийн хэрэгслийн ТЭЗҮ, зураг төслийн санхүүжилтийг нийслэлээс шийдүүлээд ойрын хугацаанд гаргах чиглэл авсан. Метроны ТЭЗҮ олон жилийн өмнөөс хийгдэж ирсэн.

Метро барих хөрөнгийн эх үүсвэрийг Засгийн газар шийдэж өгөхөөр боллоо.

Чиглэлийн хувьд Амгалангаас Яармагийн дэнж хүртэл газар доогуур метроны 22.3 километр зам барих ажлыг хийх төслийг танилцуулж байгаа.

Эдгээрийг үндэслэн шинэ ТЭЗҮ-г богино хугацаанд хийх боломж бүрдэж байгааг танилцууллаа. Метро барьж байгуулах шийдвэр Засгийн газрын түвшинд анх удаа гарч байна. Олон жил дуншиж ирсэн асуудалд Засгийн газар түүхэн шийдвэр гаргалаа. 2024 оны зургадугаар сард метро барих ажлыг нээж, 2027 онд барилгын ажлыг дуусгаад, 2028 онд метроны ажил дуусна гэсэн төлөвлөгөөтэй ажиллаж байна” гэв.