ӨнөөдөрЛ.Батсайхан: Хүүхдийн мөнгийг нөхөж олгох эсэх нь ЗГ-аас гаргасан журмаар шийдэгдэнэ
Хүүхдийн мөнгөнөөс хасагдсан 9 хувийн төлөөлөл болох ээж нар ХНХ-ын сайд Х.Булгантуяад шаардлага хүргүүллээ. Тэд хүүхдийн мөнгийг ялгаварлахгүй олгох, ингэхдээ нэгээс тавдугаар сарын мөнгийг нөхөж олгохыг шаардсан юм.
Үүний дагуу ХНХЯ-ны Төрийн захиргаа, удирдлагын газрын дарга Л.Батсайхан хариу өглөө.
Тэрбээр “Өнгөрсөн оны төсвийн хуулийг батлахдаа тухайн үеийн Монгол Улсын эдийн засгийн нөхцөл байдалд тааруулж баталсан. Тухайн үеийн нөхцөл байдлыг та бүхэн сайн ойлгож байгаа.
Манай яамны болоод ХНХ-ын сайдын байр суурь бол хүүхдүүдэд эрх тэгш байж, хүсэлт гаргасан хүүхэд бүрд олгох ёстой гэж үзсэн.Төсвийн асуудал Сангийн яаманд шийдэгдэнэ. Мөн ЗГ-ын шийдвэр гарна.
Хүүхдийн мөнгө олгох болон цалин нэмэгдүүлэх, тэтгэврийн зөрүүг арилгах бололцоотой болсон учраас үүнийг шийдвэрлэхээр ажиллаж байна гэсэн мэдээлэл хийсэн. Тийм учраас Сангийн яамтай хамтраад энэ талаар судалгаа хийж байна. Төсвийнхөө байдлаас болоод ЗГ-аас шийдвэр гарч журам батлагдана. Энэ журмаар хүүхдийн мөнгийг нөхөж олгох уу, үгүй юу гэдэг нь тухайн үед шийдэгдэнэ" гэв.
