Засгийн газрын хуралдаанаар хэлэлцсэн үнийн өсөлтийн асуудлаар  ЗГХЭГ-ын дарга Д.Амарбаясгалан мэдээлэл өглөө.

Тэрбээр "Засгийн газрын хуралдаанаар өнгөрсөн дөрөвдүгээр сард батлагдсан Төрийн хэмнэлтийн тухай хуулийн хэрэгжилтийг ярилцлаа. Энэ хууль хэрэгжиж эхэлснээр 2022 оны төсвийн жилдээ 5.8 орчим тэрбум төгрөгийн хэмнэлтийг гаргах тооцоо гарсан. Нийт 159 дэд, тэргүүн дэд даргыг чөлөөлсөн.

Сайдаас доош түвшний албаны машиныг хязгаарлаж  587 ширхэг машиныг унахгүй битүүмжилж, Засгийн газрын баазад хүлээлгэж өгсөн байна.  Үүгээр 568.4 сая төгрөг хэмнэсэн.

Энэ хууль бол төрийн удирдах түвшний орон тоог цөөлөхөөс гадна хуулийн бусад заалтын хэрэгжилт хангалттай түвшинд явахгүй байна гэж үзсэн. Тиймээс ЗГХЭГ-ын даргаар ахалсан ажлын хэсэг байгуулж, хуулийн хэрэгжилтийг судалъя, шаардлагатай бол нэмэлт өөрчлөлт оруулъя гэж шийдлээ.

Ойрын хоёр сар дотор Монгол орны бүх өнцөг, булан бүрд байгаа иргэний мэдээллийг хүлээн авч, шийдвэрлэх үүргийг шат шатны албан хаагчдад өгдөг болоход анхаарна. " гэв.