Хууль Зүй, Дотоод Хэргийн сайд, УИХ-ын гишүүн Х.Нямбаатар үүсээд буй нөхцөл байдалтай холбогдуулж өөрийн албан ёсны facebook хуудсаараа мэдэгдэл хийлээ.

Энэ үеэрээ тэрээр: "Би цагдаагийн байгууллагад жагсаал хийж буй залуучуудын аюулгүй байдлыг хангах үүрэг өгсөн. Ардчилсан оронд жагсаал цуглаан хийх эрх нь нээлттэй. Иймээс залуучуудын жагсаалд хүндэтгэлтэй хандаж байгаа. Миний бие 18.00 цагийн үед жагсаалд оролцож буй залуусын долоон шаардлагыг хүлээн авсан. Уг 7 шаардлагыг Ерөнхий сайдад танилцуулсан. Ерөнхий сайд Ажлын хэсэг гаргаж, шаардлага тус бүрийг хариуцсан сайд нарыг Ажлын хэсэгт оруулахаар болсон. Маргааш залуусын төлөөлөлтэй уулзах болсон. 

Залууст хэлэхэд, үзэл бодлоо илэрхийлж, улс төрийн эрх чөлөөг эдлэх чинь зөв өө. Харин Төрийн ордны хаалга үүдийг эвдэж оръё, Үндсэн хуулийн бус замаар засаг төрийн эрхийг өөрчилье гэдэг үйлдэл чинь буруу шүү гэдгийг хэлэх ёстой.

Архи согтууруулах ундааны зүйл хэрэглэсэн залуус  энэ жагсаалд мэр сэр оролцож байгаа юм байна. Энэ бол буруу. Залуусын хамгийн түрүүнд тавьж буй шаардлага бол үнийн өсөлт. Хамгийн хүнд сэдэв бол үнийн өсөлт.  Иймээс Засгийн Газар тусгай хуулийг УИХ-д тусгай горимоор өргөн барьж байна. Шатахуун, болон бусад хүнсний гол нэрийн бүтээгдэхүүний үнийг тогтоон барих хуулийг батлахаар ажиллаж байна. Энэ бол үнийн өсөлтийн эсрэг авч буй арга хэмжээ гэдгийг залуус маань ойлгох хэрэгтэй" гэв.