Ерөнхий сайд Л.Оюун-Эрдэнэ цаг үеийн асуудлаар мэдээлэл хийлээ.

Энэ үеэр сэтгүүлч "Хөгжлийн банкны чанаргүй зээлдэгчдийн ихэнх нь нэг хүнтэй хамааралтай байгаа. Энэ асуудлыг яг ямар замаар шийдэх гэж буйгаа тодорхой хэлэхгүй юу" гэж асуув.

Сэтгүүлчийн асуултад Ерөнхий сайд Л.Оюун-Эрдэнэ ""Сахал" Д.Эрдэнэбилэг бол Монголын Эль Чапо юм даа. Бүх шүүгчдийг томилдог. Одоо ч түүний гар хөл болсон шүүгчид ажиллаж л байна. Хөтөлийн үйлдвэртэй холбоотой асуудлыг бид шийдсэн. Хэн нэг хүний хувийн өмчид халдаж байгаа асуудал биш юм шүү. Д.Эрдэнэбилэг гэдэг хүнтэй хувийн өс зангидсан хэрэг биш.

"Эрдэнэт"-ийн 49 хувьтай холбоотой шүүх дээр нэг гацаа үүссэн байгаа. УИХ-ын тогтоол "Хэлцэл хийж" гэдэг үгтэй гарчихсан. Гэтэл УИХ-тай хэлцэл хийхгүй гүрийгээд байгаа. Гарын үсгээ зур гэхээр үгүй гээд байж байгаа гэсэн үг. Тэгэхээр, УЕП-ыг оролцуулж, Хөтөл болон Дарханы төмөрлөгийн үйлдвэрийг 49 хувийн өрөнд нь суутган тооцъё гэвэл ямар хэмжээний дүнтэй болох вэ гэдгийг гаргаж өгөх хүсэлт тавьсан байгаа." гэв.

Эль Чапо гэж хэн бэ?

“Эль Чапо” хочоороо алдартай Хоакин Арчивальдо Гусман Лоэра нь Мексикийн хар тамхины бүлэглэлийн толгойлогч, Синалоа хар тамхины картелийн тэргүүн аж.  Түүнийг хэд хэдэн удаа баривчилж байсан ч хоригдож байхдаа оргож байжээ.