Урлаг, спортын зарим арга хэмжээг арваннэгдүгээр сарын 1-ний өдрөөс эхлэн нээж байгаатай холбогдуулан УОК, НОК-оос мэдээлэл хийлээ.

Монгол Улсын Ерөнхий сайд Л.Оюун-Эрдэнэ " Өнөөдөр бол Монгол Улсад тэмдэглэгдэн үлдэх өдөр. Яагаад гэвэл урлаг, спортын салбар 50 хувийн дүүргэлттэй үйл ажиллагаа явуулж эхлэх гэж байна.

Бид өнөөдрийн байдлаар 2,8 сая вакцины нөөцтэй байна. Гурав дахь тунг хийж байгаа улс цөөн бий. Мөн өнөөг хүртэл хатуу хөл хориотой байгаа улс олон бий. Гэхдээ бид вакцинжуулалтдаа цаг тухайд нь идэвхтэй хамрагдаж хичээлээ танхимаар эхлүүлж чадсан.

Өнөөдрөөс эхлэн баяр ёслол, үзвэр үйлчилгээний үйл ажиллагаанд хамрагдаж байгаа хүн түргэвчилсэн шинжилгээг хийх шаардлага тавина. Түргэвчилсэн шинжилгээ 20 мянган төгрөгийн төлбөртэй ч өөр хувилбар бий. Хэрэв гурав дахь тундаа хамрагдсан бол түргэвчилсэн оношлуураар шинжилгээ хийлгэх шаардлагагүй. Мөн эрүүл мэндийн салбарыг зохион байгуулалтад оруулж үзвэр үйлчилгээний газрын гадна түргэвчилсэн оношлуураар шинжилгээ өгөх боломжийг бүрдүүлнэ." гэв.