Шадар сайд С.Амарсайхан  коронавируст халдварын нөхцөл байдлын талаарх УОК-ын дэргэдэх эрдэмтдийн зөвлөлийн судалгааг танилцуулжээ.

Тэрбээр  “УОК-ын дэргэдэх эрдэмтдийн зөвлөлийн судалгаагаар 12 дугаар сарын сүүлчээр МЮ хувилбар дэгдвэл вакцины үр нөлөө дахин буурахаас гадна дельта хувилбартай адил далайцтай тархах эрсдэлтэй тул урьдчилан сэргийлэх арга хэмжээг хойшлуулшгүй авах шаардлагатай. Өмнөх туршлагаас харахад шинэ хувилбар олон улсад бүртгэгдсэнээс хойш дунджаар гурван сарын дараа Монголд орж ирдэг. Иймд коронавирусийн МЮ хувилбар 12 дугаар сард дэгдэх тооцоолол гарсан." талаар дурдсан байна.

ДЭМБ-ын мэдээлж байгаагаар B.1.621 буюу Мю хэмээн нэрлэгдсэн тус хувилбар дархлааны системд баригдалгүйгээр хүнийг өвчлүүлэх хөнөөлт чадвартай гэнэ. Мөн зарим эрдэмтэд эл хувилбарын эсрэг зарим вакцин ямар ч үйлчилгээгүй байж болзошгүй гэж таамаглаж байгаа ч бататгахын тулд цаашид илүү нарийн судлах шаардлагатай аж.

Анх энэ оны нэгдүгээр сард Колумбад үүссэн гэх тус хувилбар өдгөө нийт 39 улсад бүртгэгдээд байна.