Монгол Улс халдварын тоогоор дэлхийд тэргүүлж, Өмнөговь аймгаас бусад аймгууд халдварын голомт боллоо. Энгийнээр бол улсаараа улаан бүс болсон гэхэд хилсдэхгүй. Энэ цаг үед наадам хийнэ гэж хөөрцөглөж байхаар түүнийгээ цуцалж оронд нь коронавируст халдварын үед шуурхай арга хэмжээ авч иргэдийн эрүүл мэндийг хамгаалбал яасан юм. 

Өдрөөс өдөрт нас баралт нэмэгдэж, эмнэлэг нь ачааллаа дийлэхгүй, иргэд энэ цаг үед гэр гэртээ эмч болж, өөрсдийгөө эмчилж байна. Хатуухан хэлэхэд эмний мөнгөгүйг нь үхэх тавилан хүлээж байна.  

Нөхцөл байдал ийм аймшигтай байхад  хэдэн тэрбумаар наадмаа тэмдэглэх гэж буй нь ард иргэдийн эгдүү, дургүйг хүргэж, наадмын төсвөө иргэддээ зарцуулж, эмийг нь хөнгөлөхөд зарцуулах уриалга гараад байна. Эрүүл байвал дараа жилийн наадам үзнэ шүү дээ.

Наадам болоход сар хүрэхгүй хугацаа л үлдээд байна. Гэтэл төр засаг нь наадмаа зохион байгуулах эсэхээ ч албан ёсоор шийдээгүй, нэг талдаа гараагүй байна. Цаагуураа хийнэ, хийхгүй гэж зөрчилдөөд л байгаа дүр зурагтай.  

Мөн наадмыг хойшлуулахыг эрдэмтэн мэргэд ч сануулж, иргэд дэмжиж байгаагаа өөрсдийн цахим хаягаараа дамжуулан илэрхийлсээр байна.

Тиймээс Үндэсний их баяр наадам, тэмдэглэлт ойн баяраа түрдээ хойшлуулчих. Эрдэмтдийнхээ үгийг сонсож, нөхцөл байдлаа мэдрэх тийм ухамсар та бүхэнд  үлдсэн гэж найдъя.