Засгийн газрын ээлжит хуралдаан өнөөдөр буюу энэ сарын 6-ны 08.00 цагт эхэлж, 12 асуудал хэлэлцэхээр товлосон байна.

Хуралдаанаар Монгол Улсын Ерөнхийлөгчийн БНЭУ-д хийсэн айлчлалын үр дүнгийн тухай, Хэлэлцээр батлах тухай, Олон улсын эрүүгийн шүүхийн дүрмийн нэмэлт, өөрчлөлтийг соёрхон батлах хуулийн төсөл, Гарын үсэг зурах эрх олгох тухай, УИХ-ын гишүүн Н.Цэрэнбатын санаачлан боловсруулсан Үл хөдлөх эд хөрөнгийн албан татварын тухай хуульд нэмэлт оруулах тухай хуулийн төслийг хэлэлцэнэ. Мөн Олон улсын нисэх буудлын нэрийг өөрчлөх, тэдгээрийн ашиглалтын талаар авах зарим арга хэмжээний тухай, Татвар төлөх хугацааг хойшлуулах тухай, БСШУС-ын сайдын гадаад томилолтын талаар, Мансууруулах эм, сэтгэцэд нөлөөт бодисын хууль бус эргэлттэй тэмцэх үндэсний хөтөлбөрийг хэрэгжүүлэх чиглэлээр зохион байгуулсан ажлын талаар, Олон улсын залуучуудын ногоон наадмын бэлтгэл ажлын талаар хэлэлцэхээр төлөвлөсөн байна.