Засгийн газар өнөөдөр хуралдаж байгаа бөгөөд хуралдаанаас гарсан зарим шийдвэрийн талаар  Барилга, хот байгуулалтын сайд Х.Баделхан мэдээлэл өглөө.

Барилга, хот байгуулалтын сайд Х.Баделхан:

Засгийн газрын хуралдаанаар төрийн орон сууцыг өмчлүүлэх тухай журам баталлаа. Иргэдээс ирсэн санал хүсэлтийн дагуу тус асуудал судалсны үндсэн дээр хэд хэдэн шийдвэрийг гаргаад байна. Үүнд:

• Ипотекийн зээлийн эх үүсвэрийн 4 хувийг нэг хувь болгон бууруулах тал дээр ажиллаж байна. Ингэснээр зээлийн эх үүсвэр хоёр дахин нэмэгдэх боломжтой ч Монголбанк үүнийг хэрэгжүүлэхгүй байгааг өнөөдрийн Засгийн Газрын хуралдаанд танилцуулсан.
• Энэ онд Ипотекийн зээлийн эргэн төлөлтийг Монголбанк хариуцаж байгаа бол ирэх жил Засгийн газар өөрөө хариуцаад явна.
• Байрны төлбөрийн 30 хувийг төлсөн тохиолдолд ипотекийн зээлд хамрагдах боломжтой болно.
• Төлбөрийн чадвартай бол таван жилийн хугацаанд байгууллагатай тохирсны үндсэн дээр сар бүр төлбөр төлвөл тухайн байрыг худалдаж авах боломжтой болно.
• ТОСК-ийн зээлд хамрагдсан иргэд ч мөн энэхүү хувьчлалд оролцож болно. Түрээсийн байраа өмчлөх хүсэлтэй иргэд хүсэлтээ ТОСК-т хүргүүлж, гэрээ байгуулна.
• 30 хувийг гурав эсвэл таван жилийн дотор төлж барагдуулах зэргээр байр олгож буй байгууллагатай харилцан зөвшилцөсний үндсэн дээр шийдвэрлэж байна.
• 1,512 айлын түрээсийн орон сууц байна. Өөрөөр хэлбэл, эдгээр 1,512 айл түрээсийн орон сууцаа хувьчилж авах боломжтой болж байна.
• Цаашид түрээсийн орон сууцыг нэмэгдүүлэх тал дээр ажиллаж байна. Тодруулбал, Дэнжийн 1000-д БНХАУ-ын буцалтгүй тусламжаар 1,008 айлын байр баригдаж байна. Болвол бид ирэх сонгуулиас өмнө тус байрыг ашиглалтад оруулна.