2018 оны үндэсний болон олон улс, тив дэлхийн түвшинд оюун ухаан, мэдээллийн технологи, спорт, байгаль хамгаалал, хүмүүнлэг, сайн үйлсийн төрөлд өрсөлдөж онцгой амжилт гарган эх орноо сурталчилж, үе тэнгийнхнээ манлайлсан “Оны онцлох хүүхдүүдэд” Монгол Улсын Ерөнхий сайд У.Хүрэлсүх шагналыг нь гардууллаа.

Хүүхдийн хөгжих, нийгмийн амьдралд оролцох, өсвөр насныхны авьяас чадвар, давуу тал, ололт амжилт, үлгэр дуурайллыг алдаршуулах зорилготой энэхүү арга хэмжээг 27 дахь жилдээ зохион байгуулж байна. Энэ жил 10 номинацид 29 хүүхэд, хөгжлийн бэрхшээлтэй найман хүүхдийн баг шалгарлаа. 

2018 ОНЫ ОНЦЛОХ ХҮҮХДҮҮД:

”СУРЛАГЫН АМЖИЛТ” НОМИНАЦИ

1. Амарсанаагийн АШИД. 17 настай. Хан-Уул дүүргийнОрчлон сургуулийн 12-р ангийн сурагч. 2017-2018 онд Орчлон, Шинэ эхлэл сургуулийн англи математикийн олимпиадын 1-р байр, Анагаахын шинжлэх ухааны их сургуулийн нэрэмжит биологийн олимпиад, улсын биологийн олимпиадын 3-р байр, олон улсын биологийн олимпиад 1-р байр, “Top in the world” олон улсын математик, байгалийн ухааны хичээлийн шалгалтын оноогоор 1-р байр Алтан медальтай, дэлхийн ТОР сурагч.
2. Амарсанаагийн ОЮУНГЭРЭЛ. 17 настай. Хан-Уул дүүргийн Орчлон сургуулийн 12-р ангийн сурагч. Кембрижийн AS  /ахлах түвшин /-ндээ математик, физик, эдийн засаг, бизнесийн хичээлүүдийг сонгон судалж 100 хувь А үнэлгээтэй шалгагдсан. Кембрижийн AS түвшний математик хичээлийн дэлхийн топ сурагч. 
3. Амардаваагийн ИТГЭЛ. 16 настай. Сүхбаатар дүүргийн Дойче Шуле бүрэн дунд сургуулийн 11 дүгээр ангийн сурагч. Улсын биологийн олимпиадын 3-р байр, “Улаанбаатар Эмпати”  сургуулийн физик, биологийн олимпиадын 2-р байр, “Номын үнэг-2018” олон улсын Герман хэл дээрх утга зохиолын уралдааны олон улсын финалд шилдэг 6-аар шалгарч, “Смарт дэлхий” сэдэвт олон улсын дүрс бичлэгийн тэмцээний  3-р байрын эзэн.

УРЛАГ, УРАН БҮТЭЭЛ  НОМИНАЦИ

1. Батбаярын НАСАНБАТ. 11 настай. Дархан-Уул аймгийн “Оюуны-Ирээдүй” цогцолбор сургуулийн 6-р ангийн сурагч.Дэлхийн бүжгийн спортын холбооны Сингапурт зохион байгуулсан “Super stars championship” 2018 тэмцээний 3-р байр, Малайз улсад зохион байгуулсан олон улсын тэмцээний  хүүхэд насны ангилалд 4 төрөлд алтан медаль, аймгийн 3 удаагийн аварга, олон улсын бүжгийн тэмцээнээс 2 алт, 2 мөнгө, 3 хүрэл медальтай шилдэг сурагч.
2. Сугармаагийн Түмэнжаргал 14 настай. Чингэлтэй дүүргийн 50 дугаар сургуулийн 8 дугаар ангийн сурагч.Арабын нэгдсэн эмират улсад зохиогдсон “Junior Model International 2018” тэмцээнд “Гранпри” болон “Super Talent Winner”, Сөүл хотод зохиогдсон “LBMA-star-2018” олон улсын тэмцээнд хамтлаг бүжгийн тэмцээнд Гранпри, “12 дугаар шилтгээн” урн сайхны киноны  гол дүрийн жүжигчин, Гүрж улсын Батума хотод зохиогдсон “TOP TEEN/CHILD MODEL OF THE WORLD” олон улсын тэмцээнд “BEST OF BEST PHOTO MODEL”.
3. Энхмэндийн ЭНХСАРНАЙ. 6 настай. Элбэг бага сургуулийн 2 дугаар ангийн сурагч. “Бяцхан мисс 2017” улсын уралдааны ”Загварлаг бяцхан мисс”, 2017 онд Турк улсын Бодрум хотод болсон “Princess of the teen globe” дэлхийн миссийн тэмцээний “Ялагчийн титэм”,  2018 онд БНСУ-д зохиогдсон “LBMA” тэмцээнд “Эми-жи” бүжгийн хамтлагаараа оролцон Гран-при шагнал, 2018 онд Турк улсын Бодрум хотод зохиогдсон “World league of beauty and fashion anniversary of the world” дэлхийн миссийн тэмцээний 2017,2018 оны ялагч,  2018 онд “Нийслэлийн шилдэг хүүхэд”-ээр шалгарсан.
4. Хосбаярын ХҮСЛЭН. 13 настай. Монгол Улсын Консерваторийн 8 дугаар ангийн сурагч. Өөрийн авъяас чадвараараа бие даасан тоглолт хийж, 24 бүтээл бүхий Монголын анхны зурагт, сидитэй номыг хэвлэн гаргасан. Улс болон олон улсын тэмцээнд удаа дараа амжилт гаргаж, 2018 онд Чех улсад болсон Б.Сметанагийн  нэрэмжит өсвөрийн төгөлдөр хуурчдын 3-р уралдаанд А ангилалын  Гран-При, Итал Улсын Рагуса хотод болсон “Ibla Grand Prize” 27-р уралдаанд  төгөлдөр хуурын хоршилоор 1-р байр, ганцаарчилсан төрөлд 1-р байр, Чех Улсад болсон “Virtuosi per di pianoforte”уралдаанд 3-р байр, Чехсоловак улсын 100 жилийн ойд зориулсан арга хэмжээнд уригдан тоглосон авъяаслаг сурагч.

БИЕИЙН ТАМИР, СПОРТ БИЕ БЯЛДРЫН ХӨГЖИЛ НОМИНАЦИ

1. Ганцэцэгийн ЗОЛЖАРГАЛ. 16 настай.Чингэлтэй дүүргийнМонгол Оросын хамтарсан 3-р сургуулийн 11 дүгээр ангийн сурагч. ОХУ-ын Улаан-Үд хотын уран сайхны гимнастикийн олон улсын тэмцээний Тусгай байр, Монголын Гимнастикийн холбооны уран сайхны гимнастикийн туслах шүүгч, Монголын Гимнастикийн холбооны уран сайхны гимнастикийн шигшээ багийн тамирчин. Монгол Улсын Спортын дэд мастер.
2. Энхбатын МӨНХ-ОРГИЛ. 12 настай.Сүхбаатар аймгийн Баруун-Урт сумын ерөнхий боловсролын сургуулийн 7-р ангийн сурагч. 2018 онд Зүүн бүсийн жудо бөхийн өсвөр үеийн аварга шалгаруулах тэмцээний 3-р байр, Олон хотын Маршал цом, Уран бүргэд тэмцээнүүдэд 3-р байр, Улсын аварга шалгаруулах болон Ази тивийн жиү жицү бөхийн тэмцээний 1, 2-р байр, Дэлхийн хүүхдийн спортын наадмын алтан медальтай.Жудо бөхийн шар бүстэй, спортын II зэргийн тамирчин.
3. Чинбатын БУЯННЭМЭХ. 16 настай. Ховд аймгийн Жаргалант сумын “Прогресс” дунд сургуулийн 12-р ангийн сурагч. 2018 онд олимпийн таеквондогийн 3-р байр, Таеквондогийн “хар бүс”, 1-р “ДАН”-ы эзэн.  Спортын дэд мастер цолтой.
4. Жадамбын ТЭНҮҮН. 15 настай. Хан-уул дүүргийн  Орчлон сургуулийн 10 дугаар ангийн сурагч. 2018 онд усанд сэлэлтийн Өсвөр үе, идэрчүүдийн улсын аварга шалгаруулах тэмцээний  2 алт, 3 мөнгөн медаль, 2018 онд олон улсын усанд сэлэлтийн нээлттэй тэмцээний хүрэл медаль, Америкийн Нэгдсэн Улсын Колорадо мужийн “Усанд сэлэлтийн аврага шалгаруулах С финалт байр”-нд шалгарсан.VISTA клубын нэрэмжит “Усанд сэлэлтийн тэмцээн”-ий 2 алт, 4 хүрэл медальтай. Монгол Улсын  Усан спорт, сонирхогчдын Холбооны Ерөнхийлөгчийн нэрэмжит тэмцээний  2 мөнгө, 3 хүрэл медалиар шагнагдсан.
5. Энхболдын ХҮСЛЭН. Дэлхийн Даамын холбооны мастер, Монгол Улсын олон хэмжээний  мастер, 2018 онд БНХАУ-ын Шинтай  хотноо зохион байгуулагдсан Ази Тивийн Аварга шалгаруулах тэмцээний насанд хүрэгч болон залуучуудын насны ангилалд амжилттай оролцож, Ази тивийн аварга, “ДЭЛХИЙН ЦОМ”-ын оноо цуглуулах цувралын “Xingqiu Cup” олон  улсын  тэмцээний  өсвөрийн  насны  ангилалд МӨНГӨН медаль, Ази тивийн аварга шалгаруулах тэмцээний Залуучууд насны ангилалд АЛТАН медаль, ОХУ болон Монгол Улсын хооронд зохиогдсон уулзалт тэмцээнд Блиц төрөлд МӨНГӨН  медаль, Өсвөр үеийн улсын аварга шалгаруулах 64 буудалт даамын  тэмцээний  үндсэн төрөлд АЛТАН  медаль, өсвөр үеийн улсын аварга шалгаруулах 100 буудалт даамын тэмцээний блиц төрөлд АЛТАН  медаль авсан их амжилтын эзэн.
6. Баттулгийн ТЭНҮҮНБОЛД.  9 настай.  “Солонго SF” сургуулийн 4 дүгээр ангийн сурагч. 2017 оны Өсвөрийн шатарчдын Улсын аварга шалгаруулах тэмцээний 1-р байр, “Цагаан бэрс 2017” Улсын аварга шалгаруулах тэмцээний Рапид төрөлд алтан медаль, Блиц төрөлд мөнгөн медаль, “Шилдэг 100” өсвөрийн шатарчдын тэмцээнд алтан медаль, Зүүн Азийн АШТ-ний Блиц төрөлд мөнгөн медаль, Рапид төрөлд шагналт 4-р байр, Бразилд улсад зохиогдсон “Өсвөрийн шатарчдын ДАШТ”-ний Хүрэл медаль, 2018 онд БНСУ-ын Чунчон хотод “Пёнчан 2018” өвлийн олимпийн хүрээнд зохиогдсон Дэлхийн Оюуны Спортын их наадмын шатрын 2 төрөлд 1-р байр, хос алтан медаль,  2018 оны Өсвөрийн шатарчдын Улсын аварга шалгаруулах тэмцээнээс 10 насны ангилалд 1-р байр, Албани Улсын Дуррес хотод зохиогдсон сурагчдын Дэлхийн аварга шалгаруулах тэмцээнд 9 насны ангилалд 2-р байр, мөнгөн медаль, Дэлхийн Шатрын Холбооны дэд мастер, Монгол Улсын Хошой аварга сурагч.

ЭХ ОРНЫ ТҮҮХ, ӨВ УЛАМЖЛАЛ НОМИНАЦИ

1. Сарангийн СУГАР. 17 настай. Хэнтий аймгийн Хан хэнтий цогцолборын 12 дугаар ангийн сурагч. 2018 онд “Монгол бичиг-бидний өмч” улсын уралдааны 1-р байр, “Үндэсний бичиг соёл” улсын уралдааны 2-р байрын шагналтай. 8-р ангийн сурагчдад Бийрэн бичгийн сургалт, Үндэсний бичгийн онол аргазүй сургалтыг зохион байгуулсан.
2. Алтанцоожийн МӨНХБИЛИГ. 10 настай. Баян-Өлгий аймгийн 2 дугаар бүрэн дунд сургуульд сурдаг. Үндэсний их баяр наадмын “Үндэсний сурын хүүхдийн харваа”-ны  1-3-р байр, МУ-ын аварга Н.Батсуурь, МУ-ын даян мэргэн Д.Норжмаа нарт хүндэтгэл үзүүлэх баяр наадмын “Үндэсний сурын харваа”-ны хүүхдийн төрөл 1-р байр, Урианхай язгуурын үндэсний тоглоом "Хорол" тоглоомын төрөл 2-р байр,Үндэсний сурын харвааны Аймгийн аварга шалгаруулах тэмцээн 1,2-р байр, Үндэсний сурын шилдэг харваач цолтой.
3. Пүрэвдоржийн СУМЪЯАСҮРЭН. 16 настай. Дундговь аймгийн Сайнцагаан сумыэ Хүмүүнлэг сургуулийн 12 дугаар ангийн сурагч. Үндэсний бичгийн улс, бүс, аймгийн олимпиад, тэмцээний тэргүүн байр 1, дэд байрын эзэн.

ХҮҮХДИЙН ӨӨРИЙН УДИРДЛАГЫН БАЙГУУЛЛАГА НОМИНАЦИ

1. Батмөнхийн ОЮУНТҮЛХҮҮР. 17 настай. Завхан аймгийн Улиастай сумын Чандмань-Эрдэнэ лаборатори сургуульд суралцдаг. Аймгийн Хүүхдийн нэгдсэн зөвлөлийн тэргүүн. Cover night, Dance competition тэмцээн, “Сэтгэлийн захидал”, “Цэмцгэр Улиастай”, “Халуун сэтгэл” аян, Дээлтэй Улиастай, кино өдөрлөг, “Зүрхнээс зүрхэнд” хандивын тоглолт зэрэг үйл ажиллагааг санаачлан зохион байгуулсан. Говь-Алтай аймгийн шилдэг хүүхэд.  
2. Энхбаярын ТАЛСТБОЛОР. 15 настай. Дархан-Уул аймгийн ерөнхий боловсролын “Дархан-Эмпати” сургуулийн 10 дугаар ангийн сурагч.Аймгийн хүүхдийн нэгдсэн зөвлөлийн тэргүүлэгч, аймаг, орон нутагтаа оролцооны байгууллагын сурагчдыг хөгжүүлэх, идэвхжүүлэх 25 төрлийн 80 гаруй арга хэмжээг зохион байгуулж, 4000 гаруй хүүхдийн хамруулсан. 2018 оны 10-р сард АНУ-ын Колорадо мужид тохиолдсон хар шуургад өртсөн хүмүүст туслахаар улсаа төлөөлөн очиж, 12 улсын 128 гэр бүлтэй хамтран 576,000 долларын хандив цуглуулж 220 гэр бүлийн 1,100 орчим хүнд тусламж үзүүлсэн. Тэргүүний уншигч Д.Нацагдорж тэмдэгтэн, Топ сурагчаар шалгарсан.
3. Шарав-Аралдийгийн МӨНХ-ЭРДЭНЭ. 15 настай. Баянхонгор аймгийн Баянхонгор сумын ерөнхий боловсролын Соого Сейко сургуулийн 10 дугаар ангийн сурагч.Сургамжит өгүүллэг уралдааны дэд байр, Шилдэг сэтгүүлч хүүхэд уралдааны 1-р байр, Аймгийн хүүхдийн урлагийн их наадамын Язгуур урлагийн төрөл 3-р байр, “Аавдаа хэлэх чин сэтгэлийн үгс” захидлын уралдааны 3-р байр, Математикийн стандарт уралдааны  1-р байр тус тус эзэлсэн шилдэг сурагч.
4. Золзаяагийн Мишээл. 17 настай.Чингэлтэй дүүргийн 23 дугаар сургуулийн 12 дугаар ангийн сурагч.  Олон улсын хэмжээнд “English School Model United Nations” буюу НҮБ-ын загвар хуралд Цөмийн атомын хороонд “Хог хаягдлыг байгальд хоргүйгээр устгах” сэвдээр Франц улсыг төлөөлөн оролцож, шилдэг төлөөлөгчөөр шалгарсан. “Mongolia Model United Nations” НҮБ-ын загвар хуралд Нийгэм, эдийн засгийн хороонд Индонез улсыг төлөөллөн оролцож, онцлох оролцогчоор шалгарсан. “Elite International Model United Nations” НҮБ-ын ОУ-ын загвар хуралд Хүүхдийн эрхийг хамгаалах хороонд “Хүүхэд ба хар тамхи” гэсэн сэдвээр Америк улсыг төлөөлөн оролцож, шилдэг оролцогчоор шалгарсан. “World Blind Union” буюу Дэлхийн хараагүйчүүдийн холбооноос 4 жилд нэг удаа зохион байгуулагддаг хараагүйчүүдийн эрхийг хамгаалах зорилгоор хуралдсан хуралд орчуулагчаар оролцсон, шилдэг төлөөлөгч. Олон улсын Англи хэлний түвшин тогтоох шалгалт TOEFL 61 оноо, Олон улсын Хятад хэлний түвшин тогтоох шалгалт TOEFL 186 оноо HSK 5 түвшин, “World Scholars Cup” ОУ-ын англи хэлний мэтгэлцээний тэмцээнд амжилттай сонгогдон оролцож, шилдэг оролцогч. Чингэлтэй дүүргийн Хүүхдийн холбооны гишүүн НҮБ-ын залуучуудын зөвлөх хорооны гишүүн.

БҮТЭЭЛЧ АЖИЛЧ ХИЧЭЭНГҮЙ БАЙДАЛ, МЭРГЭЖЛИЙН ЧИГ БАРИМЖАА НОМИНАЦИ 

1. Норовсүрэнгийн УУГАНБАЯР. 16 настай. Төв аймгийн Аргалант сумын 11 дүгээр ангийн сурагч. Малчдын “Бяцхан” бүлгийн гишүүдтэй хамтран 2011-2018 онуудад хавар, намрын их ажлын үеэр үр тариа, жимс, хүнсний ногоо тариалах, хадлан тэжээл бэлтгэх, мал маллах зэрэг хөдөлмөр эрхэлж, ардын  уламжлалт урлахуйн ухаанд суралцаж байна. 2018 онд өрхийн орлогоо нэмэгдүүлж, амьжиргаагаа дээшлүүлэхэд тариалсан хүнсний ногоо, жимс, малын тэжээл, гар урлалын бүтээлүүдээ зарж борлуулан 28,0 сая төгрөгийн хөрөнгө оруулалт хийж, гэр бүлийнхээ өрхийн төсөвт нэмэрлэсэн, бүтээл сурагч.

ХҮМҮҮНЛЭГ ЭНЭРЭНГҮЙ САЙН ҮЙЛС НОМИНАЦИ

1. Мөнхзулын ОЮУНТҮЛХҮҮР. 17 настай. Говь-Алтай аймгийн Гомбын нэрэмжит 1 дүгээр лаборатори сургуулийн 12 дугаар ангийн сурагч. Аймгийн Хүүхдийн нэгдсэн зөвлөлийн тэргүүлэгч, илтгэл, мэтгэлцээний клубын тэргүүн. 2018 онд “Хайрлагдсан хүүхэд” аяныг санаачлан 21 сая төгрөгийн дулаан хувцасыг 300 хүүхдэд гардуулж, хүмүүнлэгийн сайн үйлстэн болж, үе тэнгийнхнээ манлайлсан.
2. Зоригтын МӨНХТУЛГА. 13 настай. Дархан-Уул аймгийн 18 дугаар сургуулийн 8 дугаар ангийн сурагч.  5 наснаасаа эхлэн өөрийн санал санаачилгаар 100 гаруй хүмүүнлэгийн үйлсийг зохион байгуулж, эрсдэлт нөхцөлд амьдарч буй хүүхэд багачууд, ахмад настан, хөгжлийн бэрхшээлтэй 200 гаруй хүнд 2,8 сая төгрөгийн тусламж дэмжлэг үзүүлж, хүмүүнлэгийн сайн үйлстэн болж, үе тэнгийнхнээ манлайлсан.
3. Мөнхбатын Ану У. 10 настай. Хан-уул дүүргийн “Монгол Билиг Оюун” цогцолборын 5 дугаар ангийн сурагч. 2017 онд “Ногоон төгөл” эко клубд гишүүнээр элсэн орж 50 мод тарьсан, 2017 оноос хойш өөрийн сургуульдаа цэцэг тарих аянд идэвхтэй оролцсон ба 30 цэцэг тарьсан, 2017 онд “Хүчирхийллийн эсрэг төв”-тэй хамтран “Энхийн дуу” ажлын хүрээнд Хүсэл мөрөөдөлдөө хүрэх тэмүүлэлтэй байцгаая” сэдэвт илтгэл тавьсан, “Хөөрхөн шувууд-2017” аян зохион байгуулж шувууны үүр хийж байрлуулсан,  2018 онд “Энхийн төлөө Ану” сан үүсгэн байгуулж хөгжлийн бэрхшээлтэй 10 настай хүүд 2,2 сая төгрөгийн 5 ханатай гэр авч өгсөн, 2018 оны 8 сард БНХАУ-ын ӨМӨЗО-ы БСШУЯ-аас зохион байгуулсан “Монгол туургатан” хүүхдийн фестивалд дэд байр, 2018 онд Гүрж улсын Батуми хотод Дэлхийн бяцхан мисс-ийн тэмцээний Алтан медальтай.  

ТЕХНИК СЭТГЭЛГЭЭ, ШИНЭ САНААЧИЛГА НОМИНАЦИ

1. Баярсүхийн ЦЭНГЭЛ. 16 настай. Америк сургуулийн 11-р ангийн сурагч. Үндэсний Хүндэт сурагчийн Нийгэмлэгийн гишүүнээр сонгогдсон. Сагсан  бөмбөг, хөлбөмбөг тоглодог.  2018 оны 3-р сард  сургуулийн “Мэргэжил Сонгох өдөрлөг”-ийг амжилттай зохион байгуулж 20-оод салбарын манлайлагчтай ярилцаж зөвлөгөө авах боломжийг сургуулийнхаа хүүхдүүдэд бий болгосон. 2018 оны 4-р сард Хөгжлийн бэрхшээлтэй хүүхэдтэй эцэг эхийн холбооны шилжилтийн хөтөлбөрт зориулан “Ярьдаг ном”-ыг санаачлан хийсэн нь оюун ухааны бэрхшээлтэй хүүхэд, залуусын хэл яриа, оюун ухааныг хөгжүүлэхэд нь үнэтэй хувь нэмэр оруулж, шинийг санаачлан бүтээсэн.
2. Эрхэмбаярын АМГАЛАНТӨР. 16 настай. Сэлэнгэ аймгийн Сүхбаатар сумын ерөнхий боловсролын лаборатори 4 дүгээр сургуулийн 11 дүгээр ангийн сурагч. Сийлбэр, баримал, авто загварын төрлөөр тогтмол хичээллж, 2017-2018 онуудда авто загварын тэмцээнд оролцож, 2,3-р байрын шагнал хүртсэн. 2018 онд сургуулийн Урлан бүтээх клубын сурагчдыг удирдан монгол өв соёл, уламжлалт арга ухааны бүтээл урласан. Монголын Хүүхдийн урлан бүтээх төвийн “Тэмүүлэл” хүүхдийн баримлын тэмцээнд тэргүүн байр, олон улсын болон улсын уралдаан тэмцээнд загьар болон баримлын төрлөөр амжилттай оролцож, бие даасан үзэсгэлэн тогтмол гаргасан. Авто спортын мастер 1-р зэрэгтэй.
3. Мэгзэрийн ХОСБАЯР. 16 настай.Хэнтий аймгийн Хэрлэн сумын ерөнхий боловсролын 4 дүгээр сургуулийн 11 дүгээр ангийн сурагч. 2018 онд “Asian cup” олон улсын нисэх загварын тэмцээний 1,2-р байр, Азийн аварга шалгаруулах нисэх загварын тэмцээний 1-р байр, УАШТ-ий 1-р байр.

БАЙГАЛ ХАМГААЛАЛ, ЭРҮҮЛ АЮУЛГҮЙ ОРЧИН НОМИНАЦИ

1. Хишигжаргалын БОЛОР. 17 настай. Дархан-Уул аймгийн өрөнхий боловсролын “Од” цогцолборын 12 дугаар ангийн сурагч. “Ногоон ертөнц” эко клубын гишүүн. Мод тарих аяныг 2015 оноос зохион байгуулж, 1,000 гаруй модыг тарьж ургуулсан. Дахивар боловсруулах аян, Байгалийн ухааны аялал, Хаягдал ус, Цэцэгс алагласан танхим, Саарал усаа дахин ашиглая, Ногоон элч зэрэг үйл ажиллагааг зохион байгуулсан. Улсын биологийн олимпиадын 3-р байр, аймгийн байгалийн ухааны олимпиадын 2-р байрын шагналтай.
2. Нямсүрэнгийн ЭНХДЭЛГЭР. 16 настай.  Өвөрхангай аймгийн Арвайхээр сумын 10 дугаар ангийн сурагч. Байгаль хамгаалал, эрүүл аюулгүй орчны чиглэлээр 2018 онд 4 аян, 8 үйл ажиллагааг зохион байгуулсан. Эко явган аялал өдөрлөг, Ирээдүйд бичсэн захидал,  Хоггүй цагаан сар-хоёрдогч түүхий эд цуглуулах аян, “Цэнхэр сувд” төсөл, Байгаль хамгаалал бидний үүрэг өдөрлөг, “Ногоон боловсрол” сэдэвт өдөрлөг, 1000 цэцгийн баяр, Байгальд ээлтэй сурагч арга хэмжээг санаачлан хэрэгжүүлсэн шилдэг сурагч.  

БАГИЙН АМЖИЛТ НОМИНАЦИ

1. Өвөрхангай аймгийн Арвайхээр сумын 2-р сургуулийн Х.Пүрэвсүрэн багштай тусгай ангийн хамт олон. Сурагч Н.Эрхэмбаяр, Г.Лхагвабат, Д.Эрдэнэбат, Т.Балданхайням, Г.Тэгшбаяр, н.Жинжийбадмаа, Б.Оюумаа, М.Энхбямба, Н.Энхдэлгэр,Н.Эрхэмбаяр нар сүүлийн 3 жил тасралтгүй улсын болон олон улсын уралдаан тэмцээнд амжилттай оролцож, ширээний теннис, агаарын теннис, чөлөөт бөхийн спортоор  их амжилтуудыг гаргасан. 2018 онд олон улсын тэмцээнээс 4 алт, 5 мөнгө, 4 хүрэл медалийг авсан. 

Ерөнхий сайдын захиас

Хүүхдийн төлөө үндэсний зөвлөлийн тэргүүн, Монгол Улсын Ерөнхий сайд, У.Хүрэлсүх “Оны онцлох хүүхдүүдэд” баяр хүргэж, үг хэллээ.

Манай улсын нийт хүн амын 35.8 хувийг 18 хүртлэх насны хүүхэд эзэлдэг. Монгол Улсын Засгийн газраас хүүхдийн дээд эрх ашгийг хангах, хамгаалахын төлөө хүчин чармайлт гаргаж, төсөв хөрөнгийг үр ашигтай хуваарилах,  хүүхдийн хөгжлийг дэмжсэн бодлого хөтөлбөрийг дэмжих, хэрэгжүүлэх чиглэлээр ажиллаж байна.

Хүүхдийн төлөө үндэсний зөвлөлийн 2018 оны 03 тоот тогтоолоор байгууллага, салбар бүрт мөрдөх “Хүүхэд хамгааллын бодлогын баримт бичиг”, “Эцэг эхийн зөвлөл байгуулж ажиллах зөвлөмжийг” баталсан гэдгийг Ерөнхий сайд тэмдэглэлээ.

Хүүхдүүд та бүхэн хичээл сурлагадаа шамдаж, үе тэнгийнхнээ зөв үлгэрлэн манлайлж, цахим орчны ёс зүйтэй хэрэглээг хэвшүүлэх, эх орныхоо түүх соёлыг судлан мэдэж, эх хэлээрээ зөв ярьж, бусдад туслах, зөв шударга хүн болж хүмүүжих хэрэгтэй. Томчууд бидэнд хүүхэд, багачуудын хөгжих, зөв хүмүүжил төлөвшилтэй, эх оронч, хүмүүнлэг иргэнийг бэлтгэж, хөгжүүлэхэд зайлшгүй шийдвэрлэх асуудлууд байна. Тухайлбал, хүүхдийн амралт, чөлөөт цагийг хөгжилд чиглүүлэх бодлогыг дэмжиж, аймаг, дүүрэг бүрт хүүхдийн хөгжлийн ордон, төвүүдийг байгуулах, хүүхдийн хөгжил, төлөвшилд чиглэсэн үйлчилгээний цогц хөтөлбөр, төслийг дэмжиж санхүүжүүлэх ажлыг үе шаттай хэрэгжүүлэх шаардлагатай байгаа гэлээ.

2018 оны “Оны онцлох хүүхэд”-ээр шалгарсан эрхэм дүү нартаа боловсролтой, мэдлэгтэй байх нь ирээдүйн амьдралын баталгаа гэдгийг ухамсарлаж, эцэг эхдээ энэрэлтэй, эх орондоо хэрэгтэй, их соёл, зан заншлаа өвлөн дээдэлж, Монгол иргэнийхээ нэр төрийг өндөрт өргөж явахыг Ерөнхий сайд ерөөлөө.

Монголын маань бүх хүүхэд гэр бүлдээ аз жаргалтай өсөж, хүүхдийн эрх айл бүрийн тооноор ивгээлт наран мэт цацарч, багана мэт бат бэх, хана мэт хамгаалагдсан, босго мэт өндөр хүндлэлтэй байхыг хүсэж, хүүхэд багачууд, эцэг эх, багш сурган хүмүүжүүлэгчдэд, дасгалжуулагч, хамт олонд талархал илэрхийлж, шинэ жилийн мэнд хүргэлээ.

Эх сурвалж: Засгийн газрын Хэвлэл мэдээлэл, олон нийттэй харилцах хэлтэс