Засгийн газрын ээлжит хуралдаан маргааш буюу энэ сарын 13-ны 08.00 цагт Төрийн ордонд болно.
Энэ удаагийн хуралдаанаар нийт 16 асуудал хэлэлцэхээр төлөвлөсөн байна. Тухайлбал хэлэлцэх асуудлын жагсаалтад Энэтхэг Улсын Дотоод хэргийн сайдын айлчлалын тухай, Улаанбаатар хотын хатуу хог хаягдлыг боловсруулах байгууламжийг шинэчлэх тухай, Монгол Улсын нэгдсэн төсвийн 2017 оны гүйцэтгэл, болон О.Батнасан гишүүний боловсруулсан Хялбаршуулсан татварын тухай хуулийн төсөлд тусгах Засгийн газрийн санал, дүгнэлт багтжээ. Мөн Ерөнхийлөгч Х.Баттулгын боловсруулсан Эрүүгийн хууль болон Валютын зохицуулалтын тухай хуульд нэмэлт, өөрчлөлт оруулах тухай хуулийн төсөлд Засгийн газраас өгөх санал, дүгнэлтийг хэлэлцэхээр төлөвлөсөн байна.
Түүнчлэн Төрөөс баримтлах бодлогын хэрэгжилтийн явцад хяналт шинжилгээ, үнэлгээ хийсэн тухай болон БОАЖ-ын сайд, ХХААХҮ-ийн сайд, Эрчим хүчний сайд, Эрүүл мэндийн сайдын гадаад орнуудад хийсэн айлчлалын үр дүнгийн танилцуулгыг сонсох юм.