ӨнөөдөрЦ.Пүрэвхүү : Би утаагаа бууруул гэж 6 удаа жагссан, харин У.Хүрэлсүх бууруулж чадсан юм шүү
"Утааны эсрэг аав, ээжүүд" ТББ-ын тэргүүн Ц.Пүрэвхүү өөрийн цахим хуудсандаа Ерөнхийлөгчийн сонгуулийн талаар сэтгэгдлээ бичжээ. Тэрээр энэ удаагийн сонгуульд МАН-аас нэр дэвшиж буй У.Хүрэлсүхийг яагаад дэмжих болсноо бичсэн нь олны анхаарлыг татаад байна.
Тэрээр "Би утаагаа бууруул гэж 6 удаа жагссан. Харин утааг 47 хувиар бууруулж чадсан У.Хүрэлсүхийг Ерөнхийлөгчийн сонгуульд дэмжиж байна. Би энэ сонголтоороо бахархаж байна.
Нэр дэвшигч У.Хүрэлсүх цаашлаад шударга ёсыг сахиулах шүүх засаглалд цэвэр агаар сэнгэнүүлж чадна гэж би итгэж байгаа учраас түүнийг дэмжиж байна.
20 жил яригдсан утааг 2 жилд бууруулсан шигээ 20 жил яригдсан байгалийн баялагийг иргэн бүрийн дансанд хүргэсэн. Хэн хэзээ ингэж жинхэнээсээ байгалийн баялагаас иргэн болгоны данс уруу мөнгөөр шилжүүлж байсан юм бэ. Оюу толгой, Таван толгой хүртээмжийг телевизээр гарах сурталчилгааны нэвтрүүлгээс л сонсч байснаас дансанд ороод ирчихсэн түүгээр нь гараад талх авахыг бол анх удаа л үзлээ. Ингээд хэлэхээр утааны Ц.Пүрэвхүү У.Хүрэлсүхэд худалдагдчихаж, мөнгө авчихаж гээд л гүтгээд эхэлдэгийг би сайн мэднэ бас тоохгүй. Тэр том нам, тэр том албан ёсны аппарат хэн ч биш гэртээ суугаа Пүрэвхүүг худалдаж авна ч гэж юу байхав, над шиг зөрүүд хүн зөвхөн итгэл үнэмшилдээ л хөтлөгддөг. Бусдын шүүмжлэлийг тоохгүй өөрийн дэмжиж байгаа ажил, түүнийг хэрэгжүүлэгч багийг дэмжиж байгаа бол түүнийгээ илэрхийлж байх хэрэгтэй юм билээ.
2017 оны Ерөнхийлөгчийн сонгуулиар би Х.Баттулга нэр дэвшигчийг уг нь дэмжиж байсан юм. Бас л хүн бүр хардаад байхаар нь хэл амнаас болгоомжлоод дэмжээд ганц пост бичиж амжилгүй сонгууль өнгөрөөснөө бодохоор харамсдаг юм байна лээ. Тиймээс энэ удаад хэнийг дэмжиж байгаагаа эртхэн хэлээд, яагаад гэдгээ тайлбарлах нь бусдад сонголтоо хийхэд бас баримт мэдээллийн дэм ч болох талтай. Бас бусдын сонголтыг ч хүндэтгэж байгаа. Зөвхөн утааны эсрэг тэмцсэнээр нь дэмжээд байгаа юм биш, Монголчууд нэгдэн нийлээд нэг ажилд зорьвол, Манлайлагч нь зоригтой, сэтгэлтэй байвал бид хийж чаддаг гэдэг итгэлийг төрүүлсэн болохоор нь У.Хүрэлсүхийг дэмжиж байна. Хэрвээ тэр Ерөнхийлөгч болчихвол Шүүх засаглалаар дамжуулаад шударга ёсыг сахиулж эхлэнэ гэж итгэж байгаа" гэжээ.
