Яг одоо Ардчилсан нам эгзэгтэй үе дээрээ байна. АН өнгөрсөн хугацаанд хичнээн толгой салж, хэд хуваагдсаныг ард түмэн харлаа. Тэд эв нэгдлийг сахиж чадаагүй. Харин энэ удаагийн УИХ-ын сонгуулиар АН-аас олон жилийн туршлагатай, хашир суусан гарцаагүй намдаа суудал авчрах хүний хуучнуудаа цуглуулан нэгтгэж байгаа бололтой. АН дан ганц залуучууддаа найдахыг хүссэнгүй. Учир нь АН-ын залуучуудын амбиц их, шийдвэр гаргалт, хандлага хоромын төдийд өөрчлөгддөг онцлогтой. Тэд МАН-ыг бодвол ах нараа хүндлэх, жийрхэх гэсэн үзэл сурталгүй өөр өөрсдийн чөлөөт үзлээрээ багийн тоглолтгүй явж ирсэн. Энэ удаагийн сонгуульд гэхэд л залуучуудын холбооноосоо өчнөөн олон залуус салж, намын дарга удирдлагуудтай тохиролцохгүй явж байна. 

Ямартай ч АН-д ЕТГ-ын дарга З.Энхболд, О.Баасанхүү, С.Жавхлан, Д.Ганхуяг,  С.Баярцогт, Д.Эрдэнэбат, Р.Амаржаргал, Д.Ганбат, Н.Батбаяр гэхчлэн хуучин луйхаруудаа толгой болгон сонгуульд хүч үзэхээр болжээ. Харин залуучууддаа тодорхой хэмжээнд боломж олгож байгаа ч шалгуур өндөртэй сонгож байгаа гэнэ. Магадгүй дүү нь ахыгаа, туслах нь даргаа, залуу нь ахмад үеэ барьцгүй тонгордог АН энэ удаад хашир байх нь ч аргагүй биз ээ.