Цахим орчинд iShowSpeed буюу товчоор Speed нэрээрээ танигдсан түүний жинхэнэ нэрийг Darren Jason Watkins Jr гэдэг бөгөөд 21 настай. Тэрээр 2016 онд буюу ердөө 11 настай байхдаа контент бүтээх замналаа эхлүүлж байжээ. Эхэндээ тоглоомын контент хийдэг байсан тэрээр өнөөдөр олон улсад алдартай нэгэн болоод байна. 

Тэр ямар нэгэн маскгүй, өөрийнхөөрөө байж чадсан нь энэ бүхнийг бүтээсэн гэж хэлэхэд хилсдэхгүй. 

Цар тахлын үед бүгд л утастайгаа найзалсан цаг мөчид түүний нэр алдар улам өссөн юм. 

Хүмүүс түүнд яагаад хайртай байдаг талаар асуухад "Ямар ч шүүлтүүр, найруулгагүйгээр шууд дамжуулдаг нь миний онцлог болохоор тэр байх" хэмээн хариулсан байдаг. 

Өнгөрсөн онд Европын улсуудад очиход нь явсан газар бүрд нь фэнүүд нь дагаж, орсон дэлгүүрийг нь дүүргэж, тэр байтугай гудамжаар явж байхад нь үснээс нь татаж, тасалж авсан үсээ хүртэл цахим орчинд зарж байв. Speed ийнхүү очсон улс бүрээсээ сая сая дагагч нэмж чадсан юм.