Холливудын нэрт жүжигчин Эван МакГрегор, Стивен Сигал нар Зайсан хороололд байрладаг “Жардин” гэдэг хотхонд байр худалдаж авсан гэнэ. Стивен Сигал монгол эхнэртэй бол Эван МакГрегор монгол хүүхэд үрчилж авсан нь Монголд төдийгүй дэлхий дахинд шуугиан дэгдээж байсан билээ. Тэд Монголд ирж очдог, гэр бүлийн гишүүд нь Монголд хамааралтай учраас Улаанбаатар хотод тухлах байр худалдаж авсан нь энэ бололтой.

“Оддын дайн” киногоороо танигдсан холливудын алдарт жүжигчин Эван МакГрегор 2006 онд дөрвөн настай Б.Жамъяанцэцэг хэмээх охиныг өргөж авсан нь холливуудад багагүй шуугиан дэгдээж байсан. Харин Стивен Сигал Б.Эрдэнэтуяа гэдэг монгол бүсгүйтэй нэг гэрт ороод 10-аад жил болж байна.

Тэрээр 2001 онд Монголд анх хөл тавьж "Чингэс хааны тухай кино хийнэ, миний судсаар монгол цус гүйж байгаа" хэмээн ярьж бидний анхаарлыг татаж чадсан. Энэ үеэрээ эхнэр Б.Эрдэнэтуяатай танилцсан бөгөөд 2009 онд албан ёсоор гэр бүл болсон юм.

Энэ талаар “Jardin Residence” хотхоны борлуултын албанаас тодруулсан боловч “Худалдан авагчдын мэдээллийг манайх чанд нууцалдаг” гээд хариулахаас татгалзлаа.