Дэлхийн дижитал камерны зах зээлд №1-т бичигддэг Япон улсын Канон корпораци 2009 оноос хойш гэрэл зургийн хорхойтнуудыг удтал хүлээлгэсний эцэст EOS 7D-ийн залгамжлагч EOS 7D Mark II хагас мэргэжлийн камераа өнгөрөгч 9 сарын 15-нд танилцуулсан юм.

Тэгвэл энэ сарын 7-ны өдөр Canon брэндийн монгол дахь албан ёсны дистрибьютер Ай Ти Зон компани CANON EOS 7D Mark II хагас мэргэжлийн камерыг эх орныхоо гэрэл зураг сонирхогч, кино бүтээгчиддээ зориулан албан ёсоор танилцуулснаар Азийн бусад орнуудаас түрүүлж, Монголын хэрэглэгчид худалдан авах боломжтой болж байгаа ажээ.

EOS 7D Mark II загвар нь өмнөх загвартайгаа харьцуулахад макро зураг авах, эйкшн (action) буюу амьтдын болон спортын зураг авах, видео бичлэг хийх функцууд нь илүү сайжирсан бөгөөд 20.2 Мегапиксель APS-C CMOS мэдрэгч, хос цөмт DIGIC 6 процессороос гадна дүрсийг 65 цэгээр нарийвчлан фокуслах чадвартай болсон нь  мэргэжлийн түвшний шилдэг камерууд болох EOS 5D Mark III болон 1D –ийн зэрэгт хүрчээ.

Түүнчлэн MOV болон  MP4 форматаар full HD бичлэг хийх боломжтой болж, өөр дээр нь  GPS, USB-3.0,  мик, чихэвч, CF, SD картны оролтуудыг гаргасан гээд гэрэл зураг сонирхогчдын хорхойг хөдөлгөсөн олон технологийн дэвшлүүдийг багтаасан нь ихээхэн анхаарал татаж байгаа юм. 

Канон корпораци нь 1937 онд үүсгэн байгуулагдсан, гэрэл зураг, оффис, аж үйлдвэрийн тоног төхөөрөмжийн чиглэлээр дэлхий даяар 200 мянга гаруй ажиллагсадтайгаар үйл ажиллагаагаа явуулдаг үндэстэн дамнасан компани юм. Ай Ти Зон компани нь Канон брэндийн Монгол дахь албан ёсны дистрибьютерээр 13 дах жилдээ ажиллаж, Канон брэндийн оригналь бараа бүтээгдэхүүнийг өөрийн Канон төв болон хамтрагч түншүүд болох Саммит, Нэкст Электроникс, Арина зэрэг компанийн дэлгүүрүүдээр дамжуулан хэрэглэгчиддээ хүргэж байна.