Телевизийн супер од Опра Уинфри байр сууриа олохын тулд их олон газар ажиллаж байжээ. Тэрбээр коллежоо төгсөөд Нашвилл, Теннесси, Балтимор, Мэриленд зэрэг мужид сурвалжлагчаар ажиллаж дадлага туршлага хуримтлуулсан байна. Ингэж таван жилийг үдсэний дараа Балтиморт анхныхаа шоугаа нээж 8 жил хөтөлжээ. Мөн түүний дараа Чикаго хотод өглөөний нэвтрүүлэг хөтөлдөг байв. Харин алдарт “Опра Уинфригийн шоу” 1986 оноос гарч эхэлсэн нь түүнийг хэвлэл мэдээллийн салбарт ажиллаж эхэлснээс 15 жилийн дараа байсан юм.

АНУ-ын алдарт инээдмийн жүжигчин Тим Аллены ирээдүйг залуугийн алдаа нь бүрэн өөрчилжээ. Тэрбээр 1978 онд хар тамхины хэргээр баривчлагдан хоригдсон удаатай юм. Тэр хүнд хэцүү үед Тим өөрийгөө өөрчилж заавал амжилтанд хүрэхээ тангарагласан бөгөөд энэ зорилгоосоо няцалгүй явсаар өнөөдрийн өндөрлөгт хүрчээ. Тиймээс алдаа гаргах нь гол биш, түүнийгээ давтахгүйн төлөө хичээж суралцах нь л чухал юм.

АНУ-ын дэлгэцийн од Келли Рипа, Марк Конселас нар 1996 онд хорь гаруй насандаа хуримаа хийжээ. Тухайн үед Келли амжилтынхаа гарааг “Regis and Kelly” шоугаар, харин Марк “All My Children” нэвтрүүлгээр эхэлсэн түүхтэй. Бие биесээ ойлгон дэмждэг, амьдралын жинхэнэ ханиа олсон хүмүүс амжилтанд хүрэхэд илүү дөхөм байдаг ажээ. Иймд амьдралын хамтрагчаа сонгох эгзэгтэй үедээ яваа залуус маш няхуур нухацтай байх хэрэгтэй.

Сургууль бол мэдээж ирээдүйн амьдралын хөтөч болсон газар билээ. Гэхдээ зарим хүний хувьд тийм биш ч байж болох. Стив Жобс сурч байсан “Reed College”-оо орхиж Стив Вознякийн хамт гаражаас “Apple” компаниа эхлүүлсэн аж. Тэрээр 2005 онд Стэнфорд их сургуулийн төгсөгчдөд хандаж үг хэлэхдээ “Би коллежид 6 сарын турш сурсан боловч тэндээс өөрт хэрэгтэй нэг ч зүйлийг олж хараагүй. Харин эцэг эх минь надад боловсрол олгохын төлөө байгаа бүхнээ зориулж байсан. Тиймээс би сургуулиа орхиж, сонирхолгүй өнгөрөх өдөр хоногуудыг өөрчлөхөөр шийдсэн. Тухайн үед маш их айж байсан ч одоо эргээд харахад тэр бол амьдралын минь хамгийн зөв шийдвэр байсан.” гэжээ.

Марисса Майер Стэнфордын их сургуулийг төгссөнийхөө дараа 14 газраас ажлын санал хүлээж авчээ. Тэдний нэг нь “Google” компани байсан бөгөөд тухайн үед ердөө 19 ажилтантай байж. Гэсэн ч тэрбээр зориглон тэдний саналыг хүлээж авсан нь тус салбарт амжилт гарган улмаар “Yahoo” компаний захирал болохын үндэс болсон юм.

Шон Картер олон жилийн турш Жей Зи хэмээх нэрээр реппер хийсэн ч найзынхаа хамт “Roc-A-Fella Records” студиэ байгуулах хүртэл олны танил болж чадаагүй байна. Хэрэв тэр үед ийнхүү хувийн студиэ байгуулаагүй бол өнөөдөр дэлхийн шилдэг репперүүдийн эгнээнд бичигдэхгүй ч байсан байж болох юм.

Залуу хүмүүс хадгаламжийг төдийлөн анхаарч үздэггүй. Гэтэл хорин наснаасаа хойш жилд бага багаар нэмэгдүүлсээр тэтгэвэрт гартлаа хуримтлуулсан хадгаламжийн хүү хэр их болохыг төсөөлж байна уу. Америкийн бизнесмэн Уоррен Баффет бол үүнийг бодит үйл ажиллагаа болгосон хүн юм. Тэрбээр коллежид байхаасаа л хадгаламж нээж олон жилийн хуримтлал үүсгэсэн бөгөөд залууст хамгийн чухал зүйл бол хувийн эзэмшилтэй болох юм хэмээн захижээ.

Худалдаа арилжаа хийснээр хүн амьдралын арвин туршлага хуримтлуулах боломжтой. Тухайлбал хүнтэй зөв боловсон харьцах, тооцоо хийх, овсгоо самбаатай байх гэх мэт. “Starbucks” компаний гүйцэтгэх захирал Говард Шульц залуудаа “Xerox” компаний худалдааны ажилтан байжээ. Энэ ажил түүнийг анх кофены бизнесийн талаар бүхнийг суралцаж өнөөдрийн байр сууринд хүрэх үүд хаалгыг нээсэн байна.

Улсын нарийн бичиг болохоос олон жилийн өмнө Кондолиза Райс Денверийн их сургуульд доктор Йозеф Корбелоор хичээл заалгадаг байжээ. Багшийнх нь манлайлагч байдал Райсыг улс төрийн замаар замнахад нь ихээхэн түлхэц болжээ. Тэрбээр багштайгаа үргэлж холбоотой байж докторын зэрэг хамгаалах, төрийн байгууллагад ажиллах зэрэг олон тал дээр туслалцаа авсны ачаар гайхамшигтай амжилтанд хүрсэн аж.

Зарим хүний амжилтын түүх сургуулиа орхисноос эхэлсэн бол зарим нь насан туршдаа суралцсанаар илүү үр бүтээлтэй байх жишээтэй. “Google” компаний гүйцэтгэх захирал Эрик Шмидт бол дэлхийн хамгийн баян хүмүүсийн нэг билээ. Түүний амжилтын нууц нь сурах үйл явцаа хэзээ ч зогсоодоггүйтэй холбоотой юм. Тэрбээр Принстоны их сургууль, Берклигийн их сургууль зэрэг томоохон сургуулиудад компьютерийн чиглэлээр мэргэжил дээшлүүлэх олон ангийг дүүргэсэн байна.

Зуу зуун компанийг багтаасан “Virgin Group”-ийг үндэслэгч Ричард Брэнсон хориод насандаа энэ ажлынхаа гарааг эхэлжээ. Бага залуугаасаа амралт гэдгийг мэдэхгүй ажилласнаар агуу их үйлсийг бүтээсэн түүний зөвлөгөө бол “Хөдөлмөрч, тэвчээртэй бай” юм.

АНУ-ын чадварлаг кино найруулагч Энг Ли бүр хорин наснаасаа л энэ мэргэжлийг эзэмшихийг мөрөөддөг байжээ. Тийм ч учраас үргэлж л кино урлагтай холбогдолтой ажил хийдэг байж. Ийнхүү хүсэл мөрөөдөлдөө тууштай байснаар өнөөдрийн амжилтын эзэн болсны зэрэгцээ эхнэр нь түүнийг шантрах үед үргэлж зоригжуулдаг байна.

Билл Гейтс ба Аллен Пол нар ахлах сургуулийн найзууд байсан бөгөөд хориод насандаа хамтарч “Microsoft” компанийг үндэслэсэн юм. Тэдний бат бэх хамтыг ажиллагаа нь хүчирхэг компани байгуулах үндэс болсон билээ. Хэдийгээр сүүлд тэд салцгаасан ч Аллен нэгэнтээ “Бидэнд гайхалтай нөхөрлөл бас хамтын ажиллагаа байсан” хэмээн дурсжээ.