Узбекстаны нийслэл Ташкент  хотноо зохион байгуулагдаж буй бөхийн чөлөөт барилдааны ДАШТ-д өчигдөр 60 кг-ын жинд зодоглосон "Алдар" спорт хорооны тамирчин, дэлхийн залуучуудын аварга, Ази тивийн АШТ-ий хүрэл медальт, ОУХМ Сүхээгийн Цэрэнчимэд чөлөөт бөхийн дэлхийн аварга боллоо. Тэрбээр алтан медалийн төлөө Азербайжаны бөх Олимпийн хүрэл, ДАШТ-ий алт, мөнгө, хүрэл медальт, Европын аваргын алт, хүрэл медальтай Юлия Раткевичийг 12:3 харьцаагаар ялж, эх орныхоо төрийн дууллыг Ташкентын тэнгэрт эгшиглүүлсэн юм. 60 кг-ын жинд дэлхийд данслагдаж буй С.Цэрэнчимэд чөлөөт бөхөөр есөн жил хичээллэж буй бөгөөд дөнгөж 19-хөн настай. Ийнхүү С.Цэрэнчимэд Монголын чөлөөт бөхийн түүхэн дэх тав дахь алтан медалийг эх орондоо  авчирлаа. Түүнд баяр хүргэе.