ХАНГАРЬД 0:4 FC ULAANBAATAR
ГООЛ: Б.Амартүвшин 24’, 40’, 90’ Э.Эрдэнэболд 58’,
ШАР ХУУДАС: О.Мөнх-Од
УЛААН ХУУДАС: Б.Дархиа /Хангарьд/, Танейчи Шинта /FC Ulaanbaatar/
ШҮҮГЧ: Э.Ариунболд (Талбайн шүүгч), Б.Даваасүрэн (Туслах шүүгч), О.Хишигтөмөр (Туслах шүүгч), Д.Түмэнбаяр (4-р шүүгч)
Үндэсний "Нийслэл лиг-2014" тэмцээний 42 дахь тоглолтод "Хангарьд" клуб өөрсдийн талбай дээрээ "FC Ulaanbaatar" клубийг хүлээн авч тоглолоо. Тоглолтод "FC Ulaanbaatar" 9 хүний бүрэлдэхүүнтэйгээр хүн дутуу тоглосон. Хэдийгээр "Хангарьд" клуб хүний илүү байдлаараа тоглолтыг давамгайлж байсан боловч тэд 4 гоолын зөрүүгээр ялагдал хүлээсэн. "FC Ulaanbaatar" клубийн тоглогч Б.Амартүвшин 24 дэх минутад гоолын салхийг хагалсан бол 40 дэх минутад тэрээр 2 дахь гоолоо хийсэн. Гэвч 1-р үеийн цаг дуусахын өмнө "FC Ulaanbaatar" клубийн легионер тоглогч Танейчи Шинта /Япон/ улаан хуудсаар торгуулж талбайг орхисноор, хүн дутуу тоглож буй багаа улам хүнд байдалд орууллаа. Гэсэн хэдий ч тоглолтын 2-р хагаст "FC Ulaanbaatar"-ынхан чадварлаг тоглож, 58 дахь минутад Э.Эрдэнэболд гоолдож тооны харьцааг 3:0 болгосон бол тоглолт дуусах мөчид "FC Ulaanbaatar" клубийн 2 гоолын эзэн Б.Амартүвшин торгуулын цохилтыг “Хангарьд”-ын хаалганд оруулж, хет-трик хийлээ. Ийнхүү "FC Ulaanbaatar" клуб 4:0 харьцаагаар "Хангарьд" клубийг талбай дээр нь буулган авлаа.