Наймдугаар сарын 14-ны энэ өдрийг Монголын жүдочдод хамгийн чухал, ээлтэй, мартагдашгүй өдөр гэж үздэг. Учир нь 2004 оны энэ өдөр Афины олимпод оролцсон тамирчдаас Х.Цагаанбаатар ганцаараа хүрэл медаль хүртсэн бол 2008 оны энэ өдөр Н.Түвшинбаяр олимпийн алтан медалийг анх удаа эх орондоо авчирсан юм. Монгол хүн бүрийн самсаа шархирч, магнай тэнийсэн энэ өдрийг долдугаар сарын 1-ний хар өдрийг бага ч болов цайруулсан хэмээн үздэг.