Монголын пауэрлифтингийн холбооны эрх ашгаас болж энэ сард Румын улсад зохиогдож буй пауэрлифтингийн дэлхийн аварга шалгаруулах тэмцээнд оролцох шилдэг тамирчнаа үлдээгээд явжээ.

Тодруулбал, Монголын пауэрлифтингийн холбооны ерөнхийлөгч Д.Баттулга нь дэлхийн аварга шалгаруулах тэмцээнд шилдэг тамирчин Б.Маралыг өөрийн үзэмж, ашиг сонирхлоос болж тэмцээнд нь явуулалгүй үлдээсэн ёс зүйгүй үйлдэл гаргажээ. 

Монголын пауэрлифтингийн шилдэг ганц эмэгтэй тамирчин Б.Марал нь Монгол Улсын болоод Азийн рекорд эзэмшдэг, Монголын 10 удаагийн аварга, Ази тивийн опен ангиллын гурван төрөлтийн нийлбэрийн анхны медальтан, дэлхийн аваргын анхны таталтын хүрэл медалын эзэн юм.

Б.Маралын хувьд 11 дүгээр сард болох Пауэрлифтингийн дэлхийн аварга шалгаруулах тэмцээнд явахаар өөрийн зүгээс мандатны мөнгө, буудал захиалга зэрэг холбогдох бүх зардлаа гарган шилжүүлж, бэлтгэл ажлаа хангаад байсан аж. Гэтэл Монголын пауэрлифтингийн холбооноос тэмцээний цагийг нь тулгаад Б.Маралыг дэлхийн аваргад оролцох жагсаалтаас нэрийг нь зохион байгуулалттайгаар хасаж, оронд нь өөрийн гэх тамирчнаа оруулсан байжээ. 

Тус холбооны бусад гишүүдийн зүгээс уг хууль бус, ёс зүйгүй үйлдлийг эсэргүүцэж, Соёл, Спорт, Аялал Жуулчлал, Залуучуудын сайд Ч.Ундрамд хандаад байгаа аж.

Спортын салбарын нэгдсэн холбооныхоны дунд шилдэг тамирчдаа гадуурхах, өсөн дэвжих эрхийг нь хаах, холбооны ерөнхийлөгчийнхөө эвээлд ороогүй бол амжилтын замыг нь хаадаг байдал газар аваад буй. Олон улсын чанартай тэмцээн уралдаанд тамирчид хувь зүгээс бус заавал мэргэжлийн холбооны нэр дээр оролцдог тул холбооныхоо ая, талыг харж ажиллаж, амьдарч буй нь нууц биш юм.