БНСУ-ын Пёнчан хотод наймдугаар сарын 4-6-ны өдрүүдэд дугуйт цанын насанд хүрэгчдийн “Азийн цом”-ын аварга шалгаруулах тэмцээн боллоо.  БНХАУ, БНСУ, Тайвань, Тайланд, Монгол, Казахстан, Филиппин гэсэн долоон орон оролцсон тэмцээн ойр, холын зайн төрлүүдээр явагдаж аваргуудаа тодрууллаа.

Тэмцээний сүүлийн өдөр болсон эмэгтэйчүүдийн 10 км сонгомол зайн бөөн гараатай уралдаанд Э.Ариунтунгалаг хүрэл медаль хүртлээ. Тэрээр өмнөх хоёр зайд дөрөвдүгээр байрт орсон ба өчигдрийн гараанд амжилттай уралдаж, Тайвань, БНСУ-ын тамирчдын ард медальт байранд орлоо. Энэ зайд манай тамирчдаас 10 км-ын тэшилт зайн уралдаанд хүрэл медаль хүртсэн Н.Нандинцэцэг долоодугаар байр эзэлсэн бол Т.Ариунболд 10, Б.Номин-Эрдэнэ 12-р байрт орлоо. Нийт 24 тамирчин уралдсанаас Тайвань, БНСУ, Монголын тамирчид медальт байрыг эзлэв.

Харин эрэгтэйчүүдийн 15 км сонгомол техникийн бөөн гараатай уралдаанд БНХАУ, БНСУ-ын тамирчид медалийн эзэд болсон бол Б.Ачбадах дөрөвдүгээр байр эзэллээ. Т.Өсөх-Ирээдүй 9-р байр, О.Золбаяр 14, А.Хүслэн 24-р байрт орсон амжилтыг үзүүллээ. Нийт 52 тамирчин гараанаас гарснаас Монголын хоёр тамирчин эхний 10-т багтав. 

Б.Ачбадрах 15 км тэшилт техникийн уралдаанд хүрэл медаль хүртсэн бөгөөд бусад зайд дөрөв, тавдугаар байр эзэлж баг тамирчдаа тэргүүллээ. 

“Азийн цом”-ын аварга шалгаруулах тэмцээнийг зохион байгуулагч БНСУ-ын баг тэргүүлж, Тайвань, БНХАУ, Казахстаны баг удаалав. Монголын баг гурван хүрэл медальтайгаар багийн дүнгээр тавдугаар байр эзэллээ.

Дугуйт цанын дараагийн “Азийн цом” цуврал тэмцээн ирэх аравдугаар сард Казахстан улсад болно.