Узбекистаны нийслэл Ташкент хотод холимог тулааны залуучууд, насанд хүрэгчдийн дэлхийн аварга шалгаруулах тэмцээн болж байна.  Энэ сарын 10-нд өндөрлөх тус тэмцээнд 85 орны 900 гаруй тамирчин өрсөлдөж байгаа юм.

Тэмцээний залуучуудын эмэгтэйчүүдийн 61.2 кг-ын жинд манай улсаас Азийн аварга шалгаруулах тэмцээний хүрэл медальт Б.Алтанчимэг хүрэл медалийн болзол хангажээ.

Тэрбээр шөвгийн наймын тулаандаа эзэн орны тулаанч Покиза Баксриеваг ялснаар хүрэл медаль зүүх нь тодорхой болсон юм.

Тэгвэл өнөөдөр мөнгөн медалийн төлөө Европын аварга, Словакийн тамирчин Эва Эрделиоватай тулалдана.

Б.Алтанчимэг холимог тулааны ДАШТ-ээс медаль хүртсэн анхны монгол тамирчин болж байна. Түүний хувьд дөрвөн сарын өмнө холимог тулааны Азийн аварга шалгаруулах тэмцээнээс хүрэл медаль хүртсэн билээ.