“Парис-2024” зуны XXXIII Олимпын наадмын мөнгөн медальтан ОУХМ Б.Баасанхүү болон жүдогийн баг тамирчид өнөө өглөө эх орондоо ирлээ. 

Бавуудоржийн Баасанхүү нь Монголын багийн түүхэнд олимпын 12 дахь мөнгөн медалийн эзэн болоод байгаа юм. 

Энэ үеэр ОУХМ Б.Баасанхүү "Бүх тусалж дэмжсэн хүмүүстээ баярлалаа гэж хэлмээр байна. Баг хамт олон болон багш нартаа маш их баярлалаа. 

Олимпын баг тамирчдаа унасан ч, давсан ч үргэлж дэмждэг байгаарай. Олимпод оролцож буй үлдсэн тамирчдаа сайхан ерөөлийн үгээр дэмжицгээе. Олимпод оролцохоор үлдсэн Монголынхоо тамирчдад амжилт хүсье. Мөнгөн медаль маань булган сүүлтэй байг ээ." гэв.

Жүдо бөхийн холимог багийн аварга шалгаруулах тэмцээн наймдугаар сарын 3-ны өдөр болж багийн барилдаанд Монголын тамирчид Израилын багт 4:3 харьцаагаар хожигдож тэмцээнээ өндөрлүүлсэн билээ.