Өмнөд Америк тивд зохиогдсон тэмцээнд тус тивийн баг өндөр амжилт үзүүлдгийн жишгээр Коста­Рикагийн баг сайн тоглож түүхэндээ анх удаа шигшээ наймд шалгарлаа. Тэд тоглолтын эхнээс л сайн тоглож өөрсдөдөө олон боломж гаргаж байсан ч төгсгөлөө амжилттай болгож чадахгүй байлаа. Харин хоёрдугаар хагас эхлээд дөнгөж долоон минут өнгөрч байхад Коста­Рикагийн багийн ахлагч Брайан Руйз багийнхаа хаалга чиглэсэн анхны оновчтой цохилтыг гүйцэтгэн гоол оруулж, багтаа тэргүүлэл авчирсан. Үүний дараа эрч хүчтэй болж улам сэргэсэн коста­рикачууд дахин гоол оруулахаар довтолж байсан ч багийн ноён нуруу болсон хамгаалагч Оскар Дуартег алдаж арвуулаа үлдсэнээс хойш довтолгоондоо тийм ч сайн орж чадахгүй байв. Нөгөө талаас хүний илүү дээр нь бат цайз мэт хамгаалалтаараа алдартай Грекийн хамгаалалтыг нэвтэлж чадахгүй байв. Тиймээс тоглолтыг энэ чигээр нь дуусгахыг хүссэн ч Грекийн баг шүүгчийн мэдлийн нэмэлт цаг буюу 90+1 дэх минутад гоолдож, хожигдох аюулаас аврагдав. Үүний дараа багууд талдаа 15 минут, нийтдээ 30 минут тоглосон ч тусыг эс олон торгуулийн цохилтоор бүхнийг шийдэх болов. Ингээд пенальт цохиход коста­рикачууд бүх цохилтоо амжилттай болгож, Грекийн багийн Теофанис Гекас цохилтоо амжилтгүй болгосноор Коста­Рикагийн сүүлийн цохилтыг харахаар болов. Харин Коста­ Рикагийн хамгаалагч Майкл Умана цохилтоо алдалгүй цохиж юуны төлөө үхлийн хэсгээс нэгээр гарч ирснийхээ хэргийг гаргаж, Грекийг нутаг буцаав. Коста­Рика дэлхийн аваргын үхлийн хэсэг “D” хэсгээс Англи, Итали, Уругвайн хүчтэй багийг ээлж дараалан буулгасаар хэсгээ тэргүүлэн гарч ирсэн бол Грекийн баг сулхан хэсгээс хоёроор гарч ирсэн. Ямартай ч, хасагдах шатны эхний тоглолтоо ялалт байгуулсан Голланд, Коста­ Рикагийн баг долдугаар сарын 5­ны 04:00 цагаас хоорондоо учраа таарч шигшээ дөрөвт хэн нь шалгарахаа үзнэ.