АНУ-д амьдарч сурдаг Монголчуудын дунд нэр хүндэттэй арга хэмжээ болох Монголчуудын Хөл бөмбөгийн аварга шалгаруулах  уламжлалт 9 дүгээр тэмцээн энэ сарын 23-25-ны өдрүүдэд Нью Жерси мужийн Хамилтон хотноо монгол туургатнуудын дунд амжилттай болж өндөрлөв.

Энэ жилийн тэмцээнийг Нью Жерси мужид анх удаа хийх "Нью Жерси жигүүр" багийн гаргасан саналыг Нью-Йорк хот дахь Монгол улсаас НҮБ-ын дэргэд суугаа Байнгын төлөөлөгчийн газар дэмжин ажилласан бөгөөд тэмцээнийг Байнгын төлөөлөгч, элчин сайд О.Оч нээж үг хэлэв.

Байнгын төлөөлөгч тэмцээнийг зохион байгуулагч Америк дахь Монголчуудын Хөл Бөмбөгийн Холбооны удирдлага  болон эл тэмцээнийг улам бүр сонирхолтой болгож буй халимаг, буриадын баг тамирчдад талархаж, биеийн тамир спортын талаар төрөөс баримтлах бодлогын хүрээнд бүхий л спортыг төрийн дэмлэгтэйгээр хөгжүүлэх боломж бүрдээд байгаа, мөн Монгол Улсын Ерөнхийлөгчийн дэмжлэгээр Хөл бөмбөгийг хөдөө орон нутагт хөгжүүлэх цогц хөтөлбөр хэрэгжиж буйг цохон тэмдэглээд дэлхийн спортын хамгийн гайхалтай агуу том баяр болох Дэлхийн Хөл Бөмбөгийн цомын өмнө болж байгаагаараа эл тэмцээн улам сонирхолтой болж байна гээд нийт тамирчид оролцогчдод амжилт хүсэв. Түүнчлэн биеийн тамир спортын үйлсэд, тэр тусмаа хөл бөмбөгийг хөгжүүлэхэд  үр бүтээл, хичээл зүтгэлтэй ажилласан Чикаго багийн Улсболд спортын дэд мастер, Жавхлан спортын мастер цол хүртэж, мөн "Нью Жерси жигүүр" багийн ахлагч, энэ жилийн тэмцээнийн гол зохион байгуулагч В.Ганхуяг Монголын Олон Улсын Олимпын Холбооны  "Алтан одон"-гоор шагнуулав.

Эл тэмцээнд залуучуудын ангилалд 9 баг, ахмадын ангилалд 6 баг нийт 15 баг ширүүн өрсөлдөж,  залуучуудын ангилалд халимагийн Жангар баг аваргалж,  2-р байрт Вашингтон ДС баг, 3-р байрт Мон Юнайтд баг, ахмадын ангилалд Дэнвэрийн Алтанбөмбөг баг аваргалж, 2-р байрт Сан Франциско-гийн баг, 3-р байрт Мон Юнайтд баг тус тус шалгарав.

Тэмцээний дараа монгол туургатнуудын хэл, соёл, урлагаа дээдлэсэн цэнгүүн болсон нь оролцогчдын сонирхол, анхаарлыг зүй ёсоор татав.