Өнгөрсөн улиралд Италийн Сери А лигт тун тааруу тоглосон “Милан” клуб дасгалжуулагчаар солих гэж байна. Хэвлэлүүдийн мэдээлснээр Кларенс Зеедорфыг Италийн шигшээ багийн довтлогч асан Филиппо Инзаги орлох бололтой. Зеедорф таван сар “Милан” клубыг удирдах хугацаандаа удирдах зөвлөлийн гишүүдтэй тааруухан харилцаатай байсан нь түүнийг солих үндэслэл болох бололтой. Клубын эзэн Силвио Берлускони болон гүйцэтгэх захирал Адриано Галлиани нар Филиппо Инзагийг сонгох нь зүйтэй гэж үзсэн байна. 41 настай Инзаги “Милан” клубт тоглогчийн хувиар 11 жил хүчин зүтгэж, Сери А болон Аваргуудын лигт тус бүр хоёр удаа түрүүлж байсан. Харин 2012 онд зодог тайлснаасаа хойш “Милан” клубын залуучуудын багийг удирдаж байсан.