Монгол Улсын Хөдөлмөрийн баатар, Дэлхийн аварга, олимпийн хүрэл медальт, Гавьяат тамирчин Хашбаатарын Цагаанбаатар их спортоос зодог тайлах шийдвэр гаргажээ. Түүний хувьд тамирчны карьертаа цэг тавьж, дасгалжуулагчийн хувиар жүдогийн татами дээр үлдэх хүндхэн шийдвэрийг гаргаад байна.

Х.Цагаанбаатар гавьяат цаашид бусад багш нарын хамт жүдо бөхийн шигшээ багийнхаа бэлтгэл, сургуулилтыг удирдан, ажиллах аж.

Тэрбээр энэ талаар "Шийдвэрээ нэгэнт гаргасан. Бүр тодруулбал, энэ жилий Дэлхийн аваргын дараа холбооны удирдлагууддаа зодог тайлах тухайгаа хэлсэн. Өөрөө тамирчны хувиар карьераа өндөрлүүлж байгаа ч жүдо бөхийн шигшээ багийн хамт олонтойгоо ажиллаж, дэлхийн бөхчүүд бэлтгэхийн төлөө хичээх болно" хэмээв.